Azərbaycanın ən uzun körpüsü istifadəyə verildi - FOTO

Şin çayı üzərində inşa olunan Şəki və Qax rayonlarını birləşdirən körpü istifadəyə verilib. Şəkinin İnçə kəndi ərazisində inşa olunan bu yolötürücü Azərbaycanın ən uzun körpüsüdür.

Nəqliyyat Nazirliyinin mətbuat xidmətindən Lent.az-a bildiriblər ki, ümumi uzunluğu 1300, eni 13 metr olan körpü Şəkinin 21 kəndini əhatə edir. Körpünün açılış mərasimdə nəqliyyat naziri Ziya Məmmədov, Milli Məclisin deputatları da iştirak ediblər. Son illər yol infrastrukturunun, eləcə də ölkənin əsas magistral yollarının yenidən qurulması istiqamətində həyata keçirilən genişmiqyaslı tədbirlərdən danışan Ziya Məmmədov deyib ki, son 3 ildə bu sahəyə həm Azərbaycanın dövlət büdcəsi, həm də beynəlxalq təşkilatların krediti hesabına 3 milyard manatdan artıq vəsait cəlb olunub: “Bunun nəticəsində həm Bakı şəhərində müxtəlif səviyyəli körpülər, yol qovşaqları, tunellər inşa edilib, dünya standartlarına uyğun yeni yollar salınıb, həm də rayonların yol-nəqliyyat infrastrukturu xeyli yaxşılaşıb”.

Nəqliyyat Nazirliyində deyirlər ki, yeni istifadəyə verilən körpü Şəkinin 21 kəndini əhatə etməklə, ərazidə yaşayan 34 mindən artıq əhaliyə xidmət göstərəcək. “Körpü-Bina-Tikinti” MMC-nin 2007-ci ildə inşasına başladığı yol qovşağı 6 körpü və 5 suötürücüdən ibarətdir. Körpünün mühafizə qurğularının uzunluğu 1240 metrdir.

Elxan SALAHOV