“SOCAR” Ukraynada “Nano” yanacağı satmağa başladı

Ukraynanın Odessa vilayətindəki Tairovo şəhər tipli qəsəbəsində “SOCAR” brendi ilə fəaliyyət göstərəcək yeni yanacaqdoldurma məntəqəsi istifadəyə verilib. Lent.az-ın ARDNŞ-in rəsmi saytına istinadən verdiyi məlumata görə, yeni yanacaqdoldurma məntəqəsi özünəməxsus arxitektur dizayna malik, yüksək texnologiyalı yanacaqdoldurma avadanlığı, müştərilərin rahatlığının təmin olunması üçün Wi-Fi internet sistemi ilə təchiz olunmuş müasir tipli texniki kompleksdir.

Burada fəaliyyət göstərən marketdə müxtəlif çeşiddə ərzaq məhsulları, eləcə də sürücü və sərnişinlərə səyahət ərzində lazım olacaq digər mallar təqdim edilir. Yeni kompleksdə “Nano 98”, “Nano 95”, “Nano DT” tipli firma brendli, eyni zamanda, ənənəvi 95 və 92 markalı yanacaq növləri mövcuddur. “Nano” – “SOCAR Energy Ukraine” şirkətinin yüksək keyfiyyətli yeni yanacaq növü olub, bütün növ benzin və dizel mühərrikli avtomobillər üçün nəzərdə tutulub. Beləliklə, “SOCAR Energy Ukraine” şirkətinin yüksək xidmət təqdim edən yanacaqdoldurma məntəqələrinin sayı 11-ə çatıb.