Azərbaycan Türkiyə ilə kənd təsərrüfatı sahəsində yeni əməkdaşlığa başlayacaq

Bu məqsədlə gələn ay Türkiyə Kənd Təsərrüfatı və İqtisadiyyat nazirliklərinin nümayəndələri, həmçinin Toxum Sənayesi və İstehsalçıları Alt Birliyinin (TSİAB) idarə heyətinin üzvləri ölkəmizə səfərə gələcək. Səfərlə əlaqədar olaraq TSİAB-ın baş katibi Tayfur Çağlayan artıq Azərbaycandadır.

Tayfur Çağlayan Lent.az-a açıqlamasında bildirib ki, 4-8 sentyabr tarixlərində reallaşacaq səfərdə qardaş ölkədən 45 nəfərin gəlişi nəzərdə tutulub: “Biz Azərbaycan Kənd Təsərrüfatı Nazirliyinin əməkdaşları ilə görüşəcəyik. Gördüyümüz işin bu qurum tərəfindən rəsmi şəkildə dəstəklənməsi bizim üçün vacib şərtlərdən biridir. Çünki bizim kəşf etdiyimiz toxumların Azərbaycan Kənd Təsərrüfatı Nazirliyi tərəfindən tanınması lazımdır. Dünən nazir müavini ilə ilkin görüşümüz zamanı görüləcək işlər barəsində danışdıq”.

Tayfur Çağlayan ilk olaraq Azərbaycana səfər etdiklərini qeyd edib: “İlk olaraq qardaş ölkəylə əməkdaşlığa başlamağımız heç də səbəbsiz deyil. Bir millət, iki dövlət olduğumuzu bir daha sübut etmək üçün buraya gəldik. İlk olaraq hər iki ölkənin toxum sektorunda əldə olunan nailiyyətlər və görüləcək işlər planlaşdırılacaq. Daha sonra isə yerli və türk firmaları arasında toxum ticarətinin inkişafı ilə bağlı əməkdaşlıq müzakirə olunacaq”.

Xəyalə