Müəyyən miqdarda bu alkoqolu qəbul edən insanlarda ürək-damar xəstəliklərindən ölüm riski digər spirtli içkilərlə müqayisədə daha aşağı olub.
Lent.az xəbər verir ki, bütün alkoqol növləri sağlamlığa eyni təsir göstərmir. Yeni araşdırmaya görə, şərab pivə və ya güclü spirtli içkilərlə müqayisədə sağlamlıq üçün daha az riskli ola bilər lakin burada vacib bir məqam var.
Araşdırma 2006–2022-ci illər arasında 340 mindən çox Böyük Britaniya vətəndaşını əhatə edib. UK Biobank məlumatlarından istifadə edən tədqiqatçılar iştirakçıların anketlərini analiz ediblər. İştirakçılar alkoqol qəbul səviyyəsinə görə dörd qrupa bölünüb.
Alkoqol miqdarı standart porsiyalarla ölçülüb. Məsələn, bir banka pivə, bir stəkan şərab və ya bir qədəh güclü içki təxminən eyni miqdarda 14 qram təmiz spirt ehtiva edir. Ürək-damar xəstəliklərindən ölüm göstəriciləri analiz edilərkən məlum olub ki, orta səviyyədə şərab içənlərdə bu xəstəlikdən ölüm riski heç içməyən və ya çox az içənlərlə müqayisədə 21 faiz daha aşağıdır. Eyni zamanda nəzərə almaq lazımdır ki, bu araşdırma müşahidə xarakterlidir. Yəni nəticələr yalnız əlaqəni göstərir, səbəb-nəticə əlaqəsini tam sübut etmir.
Digər tərəfdən, hətta az miqdarda güclü spirtli içkilər, pivə və ya sidr qəbul edənlərdə ürək-damar xəstəliklərindən ölüm riski 9 faiz daha yüksək olub. Alkoqol növünə görə risk fərqləri əsasən az və orta səviyyədə qəbul zamanı müşahidə olunub. Çox alkoqol qəbul edən insanlarda isə ümumi ölüm riski 24 faiz daha yüksək olub. Bundan əlavə, bu şəxslərdə xərçəngdən ölüm riski 36 faiz, ürək-damar xəstəliklərindən ölüm riski isə 14 faiz daha yüksək olub.
Bu nəticələr göstərir ki, alkoqolun növü və miqdarı sağlamlığa ciddi təsir edir və hətta “daha təhlükəsiz” sayılan variantlar belə yalnız ölçülü istifadə edildikdə nisbətən az risklidir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
