ADU rektoru I kurs tələbələri ilə görüşüb - FOTO

Sentyabrın 15-də Azərbaycan Dillər Universitetində (ADU) “Bilik günü” münasibətilə universitetin rektoru, millət vəkili, professor Səməd Seyidov I kurs tələbələri ilə görüşüb. Universitetin mətbuat xidmətindən Lent.az-a verilən məlumata görə, ADU-nun akt zalında keçirilən görüşdə rektor Bilik günü münasibətilə professor – müəllim heyətini, tələbələri təbrik edib. Azərbaycanın təhsil sistemində özünəməxsus yer tutan Azərbaycan Dillər Universitetinə daxil olan tələbələrə uğurlar arzulayıb.

Rektor Cənubi Qafqazda ən böyük İnformasiya Resurs Kompleksinin ADU-da fəaliyyət göstərdiyini və kompleksdə tələbələrin təhsili üçün bütün şəraitin yaradıldığına diqqət çəkib: “Yeni tədris ilində universitetə qəbul planı 60% artırılıb”.
ADU-nun məzunu Azərbaycan Tələbə Gənclər Təşkilatları İttifaqının sədri (ATGTİ) Şahin İsmayılov isə çıxışında universitet rəhbərliyinin gəncliyə olan diqqət və qayğısından danışıb və rəhbərliyə öz təşəkkürünü bildirib. Qeyd edək ki, yeni tədris ilində Azərbaycanda ən gənc tələbə ADU-da təhsil alacaq. Universitetin 1 saylı İngilis dili fakültəsinə qəbul olan Ulduz Salahlının 15 yaşı var.