“Gənc istedadlar” liseyində Bilik bayramı - FOTO

Bu gün Bakı Dövlət Universitetinin nəzdində fəaliyyət göstərən “Gənc istedadlar” liseyində Bilik günü keçirilib. BDU-nun mətbuat və informasiya şöbəsindən Lent.az-a verilən məlumata görə, dövlət himni səsləndikdən sonra BDU-nun rektoru, akademik Abel Məhərrəmov tədbir iştirakçılarını bu münasibətlə təbrik edib, liseyin qazandığı uğurlardan söz açıb. İndiyədək liseyi bitirmiş məzunların hamısının ən qabaqcıl ali məktəblərə daxil olduqlarını, bununla da BDU-nun adına böyük şərəf gətirdiklərini söyləyən rektor, bu il 1000 nəfərin arasından seçilmiş 80 şagirdin də yaxşı oxuyacağını, universitetimizə şərəf gətirəcəyinə ümid etdiyini bildirib. Liseyin direktoru, professor Qasım Hüseynov da şagirdləri yeni dərs ilinin başlanması münasibəti ilə təbrik edib, onlara uğurlar diləyib. Sonra söz 686 bal toplayan və təhsilini BDU-da davam etdirəcək Bəhram Axundova, son iki ilin Respublika Olimpiadasının qalibi, Astanada keçirilmiş Beynəlxalq Mendeleyev Olimpiadasının üçüncü mükafatçısı Sona Quluzadəyə verilib. Liseyin 6-cı sinif şagirdləri Lalə Muradlı və Orduxan Qəhrəmanzadənin çıxışından sonra liseyə yenicə qəbul edilmiş beşinci sinif şagirdləri - qəbulda yüksək bal toplamış Fərid Mahmudov və rus sektoruna qəbul üzrə ən yüksək bal toplamış İmran Cəbrayılov çıxış ediblər.