46 nəfər istehsalat xəsarətindən ölüb

2010-cu ilin 9 ayı ərzində Dövlət Əmək Müfəttişliyi (DƏM) tərəfindən 2 min 250 müəssisə, idarə və təşkilatda keçirilmiş dövlət nəzarəti aparılıb. Bu zaman əmək qanunvericiliyinə əməl olunmasına dair 7 min 43 qanun pozuntusu aşkarlanıb.

Əmək və Əhalinin Sosial Müdafiəsi Nazirlindən verilən məlumata görə, bu pozuntulara ticarət və ictimai iaşədə (2110), sənayedə (1251), mənzil-kommunal xidmətində (594), elm, təhsil, mədəniyyətdə (638), tikintidə (528) daha çox rast gəlinib. Hesabat dövründə əmək müqaviləsi olmadan işə cəlb edilmiş 6 min 160 nəfər fiziki şəxslə əmək müqaviləsinin bağlanılması təmin edilib. DƏM-in vəzifəli şəxsləri tərəfindən aşkarlanmış inzibati xətalara görə işəgötürənlər 667 min 300 manat məbləğində cərimə olunub.

Vətəndaşlardan daxil olmuş 2 min 24 ərizə araşdırılıb və nəticədə onlara 5 milyon 959 min 794 manat gecikdirilmiş ödənclərin ödənilməsi təmin edilib Həmçinin işdən qanunvericiliyin tələbləri pozularaq azad edildiyi müəyyən edilmiş 52 nəfər əvvəlki işinə qaytarılıb.

Bu ilin yanvar-sentyabr aylarında istehsalatda baş vermiş və istehsalatla əlaqəli sayılmış 166 bədbəxt hadisədə 46 nəfər dünyasını dəyişib. Bu hadisələrdə 135 nəfər isə müxtəlif dərəcəli bədən xəsarəti alıb.

Xatırladaq ki, ötən ilin 9 ayında istehsalatda baş vermiş 192 bədbəxt hadisə nəticəsində 49 nəfər ölmüşdü.

Elxan SALAHOV