Ronaldoya ağır cəza verilə bilər - Federasiyadan AÇIQLAMA

Portuqaliya millisinin kapitanı Kriştianu Ronaldo yığmanın düşərgəsini vaxtından əvvəl tərk etdiyinə görə cəzalandırıla bilər.

Lent.az xarici KİV-ə istinadla xəbər verir ki, Portuqaliya Futbol Federasiyasının intizam qaydalarına əsasən, üzrlü səbəb olmadan milli komandanın düşərgəsini tərk edən, məşqə, oyuna və ya yığma ilə bağlı digər tədbirə qatılmayan futbolçu bir aydan altı aya qədər diskvalifikasiya edilə bilər. Peşəkar futbolçular üçün əlavə olaraq təxminən 500-1000 avro məbləğində cərimə də nəzərdə tutulur.

Portuqaliya Futbol Federasiyası da Ronaldonun milli komandanın düşərgəsini vaxtından əvvəl tərk etməsi ilə bağlı rəsmi açıqlama yayıb. Federasiya 41 yaşlı hücumçunun Kopenhagendə keçirilən təlim-məşq toplanışından ayrıldığını təsdiqləyib.

Qurumun açıqlamasında bildirilib ki, Ronaldo düşərgəni tərk etsə də, Portuqaliya millisinin Danimarka və Norveçlə qarşılaşmalara hazırlığı əvvəlcədən müəyyən edilmiş plana uyğun davam edəcək.

“Milli komandanın futbolçusu Kriştianu Ronaldo Kopenhagendə keçirilən təlim-məşq toplanışını tərk edib. Danimarka və Norveçlə oyunlara hazırlıq qalan 24 futbolçunun iştirakı ilə planlaşdırıldığı kimi davam edəcək. Bütün nümayəndə heyəti qarşıdakı oyunlara və müəyyən edilmiş məqsədlərə çatmağa tam diqqətini yönəldib”, – federasiyanın açıqlamasında qeyd olunub.

Qeyd edək ki, qalmaqal Millətlər Liqasının Norveçlə oyunundan sonra başlayıb. Sentyabrın 27-də keçirilən qarşılaşmada 41 yaşlı Ronaldo bütün oyunu ehtiyat oyunçular arasında keçirib. Portuqaliya həmin görüşdə Norveçə 2:1 hesabı ilə qalib gəlib. Baş məşqçi Jorje Jezuş qərarını taktiki səbəblərlə izah edib.

Bundan sonra Ronaldonun komandanın məşqlərində iştirak etməməsi tərəflər arasında münaqişə olduğu barədə xəbərlərə səbəb olub. Jezuş isə futbolçunun məşqdən imtina etdiyini təkzib edib və onun narazı olduğunu etiraf etsə də, ciddi qalmaqal baş vermədiyini bildirib.

Sentyabrın 30-da vəziyyət daha da gərginləşib. Jezuş mətbuat konfransında Ronaldonun Danimarka ilə qarşılaşmaya start heyətində çıxmayacağını bildirib. Bundan az sonra futbolçu Kopenhagendəki “Parken” stadionunu tərk edib və komandanın məşqinə qatılmayıb.

Ronaldo sosial şəbəkədə Portuqaliya Futbol Federasiyasının prezidenti Pedro Proensa ilə danışdıqdan sonra milli komandanın düşərgəsini tərk etmək qərarı verdiyini açıqlayıb. Futbolçu qərarının səbəblərini daha sonra açıqlayacağını bildirib və komanda yoldaşlarına uğurlar arzulayıb.

Hadisədən sonra Ronaldonun Portuqaliya millisindəki gələcəyi də müzakirə mövzusuna çevrilib. Bəzi KİV-lər onun yığmadakı karyerasını başa vurmağa hazırlaşdığı barədə ehtimallar irəli sürsələr də, Ronaldo özü milli komandadan getdiyini açıqlamayıb.