Milli Parkda ceyranın güllələnməsinə RƏSMİ CAVAB-VİDEO

Sosial şəbəkələrdə Şirvan Milli Parkında ceyranın güllələnməsi iddiası ilə görüntülər paylaşılıb.

Lent.az xəbər verir ki, paylaşılan görüntülərdə bildirilir ki, parkda saxlanılan ceyran qamışlıqda ölü tapılıb. Həmçinin tapılarkən ceyranın ayaqlarının da iplə bağlanıldığı və qamışlığa atıldığı qeyd olunub.

Məsələ ilə bağlı Bioloji Müxtəlifliyin Qorunması Xidmətinin rəsmisi Arzu Səmədova mediaya açıqlamasında bildirib ki, həmin ceyran Şirvan Milli Parkının əməkdaşları tərəfindən baytar tərəfindən müayinə olunub. Onun sözlərinə görə, ceyrana ilkin yardım göstərilsə də, təəssüf ki, ölüb:

“Ceyranın bədənindəki güllə yarası deyil. Vəhşi təbiətdə yırtıcı-şikar münasibətləri ekosistemin tarazlığını təmin edir, heyvanların yırtıcı təqibindən müdafiəsi zamanı zədə alması halları baş verir və bu da vəhşi təbiətdə baş verən normal hadisədir.

Populyasiyada itkinin olmaması mümkün deyil, nisbətən zəif fərdlərin xəstəlik, yırtıcı təqibi və s. təbii amillər səbəbindən tələf olması təbiətin qanunudur və bu hadisə ilk dəfə baş verən hadisə deyil. Unutmamalıyıq ki, ceyran həm də milli parkda yaşayan digər yırtıcı heyvanların qidasıdır. Təbiətdə yüz illərlə baş verən təbii prosesləri cəmiyyətdə təşviş obyektinə çevirmək doğru deyil”.