Kuçma jurnalistin ölümündə Mərkəzi Kəşfiyyat İdarəsini günahlandırdı

Jurnalist Georgi Qonqadzenin öldürülməsi beynəlxalq səviyyədə hazırlanmış təxribat idi və bunu xarici kəşfiyyat orqanları təşkil edib.

Lent.az-ın UNİAN agentliyinə istinadən verdiyi məlumata görə, bunu Ukraynanın sabiq prezidenti Leonid Kuçma söyləyib.

Leonid Kuçma deyib ki, məqsəd bir prezident kimi onun və Ukraynanın etibarını dünyada aşağı salmaq olub. Sabiq prezident bildirib ki, jurnalistin ölümündən sonra təşkil edilən aksiyalarda ABŞ Mərkəzi Kəşfiyyat İdarəsinin əməkdaşlarının iştirak etdiyi barədə məlumat da alıb: “Bu aksiya üçün pul veriblər, pulla isə hər şey mümkündür”.

Ukraynanın sabiq prezidenti ABŞ hakimiyyətinin dünyaya baxışında müsbət dəyişikliklər baş verdiyini, hazırkı prezident Barak Obamanın dünyaya demokratiya ixrac etmədiklərini bəyan etdiyini xatırladıb.

Qeyd edək ki, bir gün əvvəl Ukrayna Baş Prokurorluğu Georgi Qonqadzenin ölümünü təşkil etməkdə günahlandırılan Daxili İşlər Nazirliyinin departament rəisi Aleksey Pukaçın cinayət işinin başa çatdığını, cinayətin sifarişçisinin keçmiş daxili işlər naziri Yuri Kravçenko olduğu barədə məlumat yayıb.

Jurnalistin anası isə deyib ki, oğlunun ölümünü sifariş edənlər heç vaxt tapılmayacaq: “Çünki bunun üçün bütöv bir sistem işləyib. Bu, Leonid Kuçmanı hakimiyyətdən uzaqlaşdırmaq üçün bir ssenari idi”.