İki ölkə müharibənin astanasından döndü

Dünya ölkələrinin xəritəsinin yer aldığı “Google Maps”ın yanlışlığa yol verməsi üzündən Latın Amerikasında iki ölkə – Nikaraqua və Kosta Rika müharibə astanasına gəlib. Lent.az-ın “CNN”ə istinadən verdiyi məlumata görə, nikaraqualı bir komandan “Google Maps”da yer alan xəritəni əsas götürərək, tabeliyində olan hərbi birlikləri San Juan gölü yaxınlığındakı əraziyə doğru hərəkətə keçirib.

O, Nikaraqua və Kosta Rika arasındakı bu sərhəd zolağını keçib və burada yeni düşərgə qurub. Ancaq nikaraqualı hərbçilər bununla da kifayətlənməyiblər, sərhəddəki Kosta Rika bayrağını sökərək buraya öz ölkələrinin bayrağını sancıblar. Eyni zamanda çayı da təmizləyərək, zibili Kosta Rika torpağına atıblar.

Komandan “Google Maps”dakı xəritəni əsas gətirərək sərhədi keçdiyini söyləyib. Ancaq hər iki ölkədə bu bölgənin Kosta Rikaya aid olduğunu göstərən rəsmi xəritələr var.

Olaya sərt təpki verən Kosta Rika vətəndaşlarını sakitləşdirmək üçün prezident Laura Chinchilla çıxış edib, xalqı soyuqqanlı olmağa, təxribata fürsət verməməyə çağırıb.