Bakıda avtomobil alışıb yandı: ölən və yaralanan var

Bu gün Fövqəladə Hallar Nazirliyinin “112” qaynar telefon xəttinə Bakı şəhərinin Xətai rayonunda “Mercedes” markalı minik avtomobili beton maneəyə çırpılması və yanması ilə bağlı məlumat daxil olub. Lent.az-ın nazirliyin saytına istinadən verdiyi məlumata görə, xilasetmə qüvvələri, o cümlədən Dövlət Yanğından Mühafizə Xidmətinin və Xüsusi Riskli Xilasetmə Xidmətinin canlı qüvvə və texnikası hadisə yerinə cəlb olunub.

Hadisə yerində əməliyyat şəraiti qiymətləndirilərkən məlum olub ki, sürücü və 1 nəfər sərnişin hadisə yerində ölüb, 1 nəfər sərnişin yaralanıb, avtomobilin yanar hissələri isə tamamilə yanıb. Yaralı xəstəxanaya aparılıb.

Yanğın saat 03:55-də yanğınsöndürənlər tərəfindən söndürülüb. Xilasedicilər ərazidə müvafiq təhlükəsizlik tədbirləri görüb. Hadisə ilə əlaqədar müvafiq qurumlar tərəfindən təhqiqat aparılır.