“Azəriqaz”ın qarət olunan şöbə müdiri xəstəxanaya düşdü

Yanvarın 3-dən 4-nə keçən gecə Bakıda soyğunçuluğa məruz qalmış “Azəriqaz” İstehsalat Birliyinin İctimaiyyətlə əlaqələr şöbəsinin rəisi Kamandar Eyvazov xəstəxanaya yerləşdirilib. Lent.az-ın məlumatına görə, o, kəskin ürək ağrıları ilə Mərkəzi Neftçilər Xəstəxanasına çatdırılıb.

Xəbəri xəstəxanadan da təsdiqləyiblər. Xəstəxanadan Lent.az-a verilən məlumata görə, K.Eyvazov bir neçə gün əvvəl ürəyindəki problemlərlə əlaqədar müraciət edib. O, hazırda palata şəraitində müalicə olunur.

Qeyd edək ki, K.Eyvazov yanvarın 3-dən 4-nə keçən gecə 3 naməlum şəxsin hücumuna məruz qalıb. Quldurlar onun 16 min dollarını, 2 mobil telefonunu və gödəkçəsini alaraq, qaçıb.

Hadisədən dərhal sonra K.Eyvazov polisə ərizə ilə müraciət edib. O, 3 naməlum şəxs tərəfindən soyulduğunu bildirib.

Nizam Rza