Cinayətkar qadın həbsxanasına girmək üçün cinsini dəyişdi

Kişi heç bir əməliyyat keçirməyib və hormon qəbul etməyib, sadəcə olaraq qeydiyyat şöbəsinə ərizə ilə müraciət edib

Lent.az-ın xarici mətbuata istinadla xəbərinə görə, Almaniyanın gender öz müqəddəratını təyinetmə islahatlarından istifadə edən sağçı ekstremist kişi cinsiyyətini rəsmi olaraq qadına dəyişib və cəzasını qadın həbsxanasında çəkəcək.

Təfərrüatlar

2023-cü ilin iyulunda Marla-Sven Libih Saksoniya-Anhalt federal əyalətinin Halle rayon Məhkəməsi tərəfindən nifrətə çağırış, böhtan və təhqirə görə şərti azad edilmədən bir il altı ay həbs cəzasına məhkum edilib.

Maraqlıdır ki, o zaman o, Sven Libih kimi və kişi kimi tanınırdı. Daha sonra o, ilkin hökmə etiraz edib və uduzub, lakin bu, çox qəribə bir hekayənin yalnız başlanğıcı olub.

2024-cü ilin sonlarında "Qan və şərəf" adlı ifrat sağçı ekstremist qrupun üzvü olduğu iddia edilən Libih Almaniyanın öz müqəddəratını təyinetmə qanunundan istifadə edərək qanuni olaraq adını Marla-Sven Liih, cinsini isə qadın olaraq dəyişdirib.

Almaniyanın "Der Spiegel" qəzeti bu dəyişikliyin ciddi olmasının çətin olduğuna diqqət çəkir, çünki Libih illərdir sağçı ekstremist baxışları ilə tanınır və keçmişdə queerfobik açıqlamalar verib. Qəzet əlavə edir ki, Libih dövləti təxribata çəkmək və biabır etmək üçün vətəndaş statusunu təxribatçı şəkildə dəyişib.

Hələ yanvar ayında, Libihin cinsiyyətə keçidi Almaniyada manşetlərə çıxmağa başlayanda, bir çox media onun qadın həbsxanasına göndərilməsinin çətin olduğunu yazıb, çünki “yalnız təxribat məqsədilə cinsini dəyişən hər kəsə çox güman ki, həbsxanada kişi kimi davranılacaq”, lakin Marla-Sven Libih hətta onun cinsiyyətini sorğuladığı üçün “Der Spiegeli” məhkəməyə verib.

Halle şəhərinin baş prokuroru bu yaxınlarda rəsmi olaraq Marla-Sven Libihin cəzasını Hemnitsdəki qadın həbsxanasında çəkəcəyini açıqlayıb və məhkum ekstremist özü də “Twitter”də bunu təsdiqləyərək yazıb: “Həbs cəzasına planlaşdırıldığı kimi başlayacağam. çamadanlar”.

Prokuror Libihin qadın həbsxanasında tam olaraq harada yerləşəcəyi ilə bağlı hələ qərar verilmədiyini bildirib. O, əlavə edib ki, məhbusun təhlükəsizliyə və asayişə təhlükə yarada biləcəyinə və onun başqa müəssisəyə köçürülüb-köçürülməməsinə həbsxana rəsmiləri qərar verəcək.

“Euronews” xəbər verir ki, Sven Libih öz müqəddəratını təyinetmə haqqında qanun sayəsində Saksoniyanın şimal-qərbindəki Şkoyditsdəki qeyd şöbəsində “sadə bəyannamə” ilə cinsini və adını dəyişib. Libih cinsiyyət baxımından kişi olaraq qalır.