İstehlak qiymətləri 2,32 faiz artıb

İqtisadi Tədqiqatlar Mərkəzi (İTM) Azərbaycanın 10 regionunda 2011-ci ilin fevral ayı ərzində apardığı qiymətlərin statistik müşahidəsinin nəticələrini açıqlayıb.

İTM-in ictimaiyyətlə əlaqələr departamentindən Lent.az-a verilən məlumata görə, aparılmış statistik müşahidələrin nəticəsi göstərir ki, ay ərzində Azərbaycanda istehlak qiymətləri 2,32 faiz artıb. Bu zaman Bakıda qiymətlər 2,62 faiz, regionlarda isə 2,02 faiz artıb. On iki ay ərzində ölkədə 14,05 faiz inflyasiya baş verib.

Fevral ayı ərzində ən çox bahalaşma ölkədaxili dəmiryol, sərnişindaşıma nəqliyyatında (86,56 faiz), ərzaq məhsullarından toyuq yumurtasında (39,95 faiz), doğranmış çəkidə sümüklü mal ətində (14,42 faiz), kök (8,06 faiz), qeyri-ərzaq məhsullarından 585 əyarlı qızıl üzükdə (11,98 faiz), ən çox ucuzlaşma qeyri-ərzaq məhsullarından oyuncaq maşınlarda (15,44 faiz), kişi üçün sviterlər, puloverlərdə (13,75 faiz), saç üçün şampunlarda (9,87 faiz), xidmətlərdən gəlinlik donunun kirayəsində (7,53 faiz) qeydə alınıb.

Elxan SALAHOV