Abşeron yarımadasında nəhəng torpaq anbarı tikilir

ARDNŞ-nin baş ofisinin ekologiya üzrə aparıcı mütəxəssisləri şirkətin Birgə Müəssisə və Əməliyyat Şirkətlərinin mədən ərazilərində ekoloji vəziyyətin yaxşılaşdırılmasına dair aparılan təxirəsalınmaz tədbirlərin yerinə yetirilməsi işlərinə nəzarət məqsədi ilə “Bahar Enerji” və “Abşeron” Əməliyyat Şirkətlərinin kontrakt sahələrinə baxış keçiriblər.

Lent.az-ın ARDNŞ-in rəsmi saytına istinadən verdiyi məlumata görə, Birgə Müəssisə və Əməliyyat Şirkətlərində neftlə birgə hasil olan lay sularının yığılıb, emal edildikdən sonra utilizə olunması məqsədilə “Bahar Enerji” kontrakt sahəsində, neftin hazırlanması və nəqli sexinin ərazisində ekoloji tələblərə cavab verən 3000 kubmetrlik torpaq anbarı (çökdürücü) üçün yer hazırlanıb.

Anbar istismara verildikdən sonra ətrafda olan gölməçələrə axıdılan suların qarşısı alınacaq və gölməçələr qurudulacaq. Anbarın sentyabrda istismara verilməsi planlaşdırılır. Qeyd olunub ki, “Abşeron” Əməliyyat Şirkətinin “Ekoloji siyasət” sənədi hazırlanmışdır və həmin sənədə uyğun olaraq Şirkətin kontrakt sahəsinin neft-mədən ərazisi demək olar ki, bütün ekoloji tələblərə cavab verir.