Gələn ay Bakıda “Türk İxracat Məhsulları Sərgisi” keçiriləcək

Sentyabrın 6-8-də “Baku Expo Center”də “Bakı Türk İxracat Məhsulları Sərgisi” keçiriləcək. Sərginin təşkilatçısı olan “Meridyen” Beynəlxalq Sərgi Şirkətindən “APA-Economics”ə verilən məlumata görə, belə sərgilərin təşkilində əsas məqsəd Türkiyə ilə digər ölkələrin ticarət münasibətlərinin yüksəldilməsidir.

”Meridyen”in İdarə Heyətinin üzvü və layihənin Azərbaycan üzrə əlaqələndiricisi Alper Çekic bildirib ki, bu sərgi Türkiyə və Azərbaycan iş adamlarının birgə çalışmasına, ortaq iş birliyi qurmasına və qarşılıqlı ticarət əlaqələrinin inkişafa faydalı olacaq.

Sərgidə qida, tekstil, hazır geyim, mebel və emal sənayesi, inşaat maşınları və inşaat məhsulları, kosmetika, kimya sənayesi, məişət əşyalarının istehsalçısı olan 50-dən çox şirkət iştirak edəcək.

Qeyd edək ki, “Meridyen” şirkəti artıq iki ildir Azərbaycanda sərgilər təşkil edir. Belə ki, “Meridyen” əvvəlki illərdə Bakıda iki müxtəlif vaxtda “Istanbul Fashion Show” moda sərgisi və “Türk İnşaat və Makina” sərgiləri keçirib.

Qeyd edək ki, “Meridyen” digər sərgilərdə olduğu kimi bu dəfə də layihəni Azərbaycan Sahibkarlar Konfederasiyası ilə qarşılıqlı əməkdaşlıq çərçivəsində həyata keçirir.