“İbo Show”un yayımı dayandırıldı

Məşhur müğənni İbrahim Tatlısəsin Türkiyənin “atv” kanalında yayımlanan “İbo Show” proqramı dayandırılıb.
Lent.az-ın xəbərinə görə, bu barədə müğənni dünən keçirdiyi mətbuat konfransında məlumat verib. Sənətçi ötən bazar günü proqramda Yıldız Tilbə ilə aralarında baş verən gərginlikdən sonra narahatlıq keçirdiyini deyib: “Üç gündür, gördüyüm reaksiyalardan çox yoruldum, Yıdız Tilbəninin nankorluğu və yalan sözləri qarşısında mən də yalan danışa bilmərəm, “atv” ilə razılaşıb, proqramı bitirəcəyəm. Proqramda işləyən 50 nəfərin günahı Yıldız Tilbənin boynuna”.
Kanal rəhbərliyi də hadisə ilə bağlı yazılı açıqlama yayıb. Açıqlamada deyilir: “Uzun zamandır, İbrahim Tatlısesin proqramına qonaq tapmaq çətinlik yaradırdı. Biz kanal rəhbərliyi olaraq, sənətçiyə kömək etməyə cəhd göstərdik, ancaq vəziyyətin belə davam etdirilməsi mümkün deyildi. Yıldız Tilbə də buna bir misaldır. Təəssüf ki, dəvətlə proqrama qatılmaq mexanizmi işləmir. Bu, İbrahim Tatlısəsi narahat etdi və arzuolunmaz nəticələrə gətirib çıxardı. Sənətçinin istəyi ilə proqramı dayandırdıq”.

Qeyd edək ki, bazar günü proqramda Yıldız Tilbə ilə Tatlısəs arasında ciddi mübahisə yaranıb, sənətçilər bir-birlərini küçə söyüşləri ilə təhqir ediblər.