Alimlər pitonların metabolizmini araşdıraraq iştahanı azaldan bir molekul aşkar ediblər. Bu maddə laboratoriya şəraitində siçanlar üzərində artıq müsbət nəticə göstərib.
Lent.az xarici mediaya istinadən xəbər verir ki, tədqiqatçılar Birma pitonlarının qanında piylənməyə qarşı yeni dərmanların əsasını təşkil edə biləcək bir molekul müəyyən ediblər. Söhbət qidalanmadan sonra səviyyəsi kəskin artan və iştahaya təsir edən metabolitdən gedir.
Pitonlar uzun müddət ac qala bilmə qabiliyyəti ilə tanınır. Onlar öz çəkisinə yaxın ölçüdə olan ovları uda bilir və bundan sonra aylarla, hətta bir ildən çox qidasız qala bilirlər. Qidalandıqdan sonra onların orqanizmində ciddi dəyişikliklər baş verir: ürək böyüyür, metabolizm isə minlərlə dəfə sürətlənir.
Alimlər əvvəlcə bu dəyişiklikləri öyrənərək qidalanmadan sonra hansı metabolitlərin rol oynadığını müəyyən etməyə çalışıblar. Bunun üçün çəkisi 1,5–2,5 kiloqram olan gənc Birma pitonlarının qanı qidalanmadan əvvəl və sonra analiz edilib. Təcrübədən əvvəl ilanlar 28 gün ac saxlanılıb, sonra isə çəkilərinin təxminən dörddə biri qədər qida verilib.
Nəticədə qidalanmadan sonra səviyyəsi artan 200-dən çox molekul aşkar edilib. Xüsusilə bir maddə - pTOS adlı metabolit alimlərin diqqətini çəkib. Onun konsentrasiyası 1000 dəfədən çox artıb. Bu birləşmənin pitonun bağırsaq bakteriyaları tərəfindən yarandığı və az miqdarda insan orqanizmində də mövcud olduğu məlumdur.
Bu molekulun təsirini yoxlamaq üçün onu laboratoriya siçanlarına tətbiq ediblər. Araşdırma göstərib ki, pTOS enerji sərfiyyatına və ya orqan ölçüsünə təsir etmir, lakin qidalanma davranışını dəyişir. Bu maddəni qəbul edən piylənmiş siçanlar daha az qida qəbul edib və 28 gün ərzində bədən çəkilərinin təxminən 9 faizini itiriblər.
Tədqiqatçılar bildirirlər ki, bu nəticələrin praktik tətbiqi üçün əlavə araşdırmalara ehtiyac var. Bununla belə, bu molekulun insan orqanizmində də mövcud olması onun potensial təhlükəsizliyinə ümid yaradır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
