Kəmaləddin Heydərov Avstriyanın və Niderlandın Azərbaycandakı səfirlərini qəbul edib

Bu barədə APA-ya FHN-dən məlumat verilib.

Kəmaləddin Heydərov xanım Silvia Mayer-Kaybiçilə görüş zamanı ölkəmizə yeni təyin olunmuş səfirə fəaliyyətində uğurlar arzulayaraq, Avstriyanın Azərbaycanda yeni açılmış səfirliyinin ikitərəfli münasibətlərin inkişafına öz töhfəsini verəcəyini qeyd edib.

Daha sonra K.Heydərov FHN və onun qurumları, eyni zamanda nazirlik tərəfindən həyata keçirilən və planlaşdırılan layihələr, nüfuzlu beynəlxalq və regional təşkilatlarla, xarici dövlətlərin müvafiq qurumları ilə əlaqələrin inkişaf etdirilməsi istiqamətində görülən işlər barədə səfiri məlumatlandırıb.

Səfir də öz növbəsində hər iki dövlətin müvafiq qurumları arasında, həmçinin beynəlxalq təşkilatlar çərçivəsində əməkdaşlığın dərinləşməsi üçün birgə səylər göstərilməsinin əhəmiyyətini qeyd edib.

Nazir Niderland Krallığının yeni təyin olunmuş səfiri cənab Ayren Piter Uyterlindenlə
görüş zamanı Fövqəladə Hallar Nazirliyinin fəaliyyəti, strukturu və iş prinsipi barədə ona məlumat verib. Səfir də öz növbəsində səmimi qəbula görə təşəkkürünü bildirib. Görüşdə gələcək əməkdaşlığa dair fikir mübadiləsi aparılıb.