Siyavuş Novruzov: “Azərbaycanda bəzi partiyalar QHT-lər vasitəsilə maliyyələşir” - YENİLƏNİB

“Bu gün Azərbaycanda bir sıra siyasi partiyalar yaranmış QHT-lər vasitəsilə maliyyələşir. Ona görə də həmin partiyalar bu günə qədər öz maliyyə hesabatlarını bir dəfə də təqdim etməyiblər. Halbuki bütün ili şəffaflıqdan danışırlar”.

Lent.az-ın məlumatına görə, bu sözləri Milli Məclisin bugünkü iclasında QHT-lər haqqında qanuna təklif edilən dəyişiklər zamanı çıxış edən YAP icra katibinin müavini, deputat Siyavuş Novruzov deyib.

O bildirib ki, siyasi partiyaların rəhbərlərinin gəlir deklarasiyaları ilə bağlı hesabatlarında onların gəlirləri sıfır yazılıb: “Bunlar sıfırla yaşayırlar. Heç nə yoxdu, ancaq günü-gündən rəngi açılır, çəkisi artır, sürücülər, cangüdənlər saxlayır. Bunların qərargahlarına göydən dollar yağır, bizim xəbərimiz yoxdur?”.

S.Novruzovun sözlərinə görə, bu gün müəyyən dini qurumlar var ki, onlar dövlət quruluşunun dəyişdirilməsi ilə bağlı açıq fəaliyyətlə məşğuldurlar: “Biz bu yaxınlarda həmin şəxslər arasında atışmanın da şahidi olduq. Düzdür, polislərimiz operativ reaksiya ilə bunun qarşısını aldılar. Ona görə də bu məsələlərlə bağlı qanunlar sərtləşdirilməlidir”.