Azərbaycan və Ukrayna FHN arasında Tədbirlər Planı imzalanıb

Bu gün Azərbaycan Fövqəladə Hallar Nazirliyi ilə Ukraynanın Fövqəladə Hallar və Çernobl fəlakətinin aradan qaldırılması Nazirliyi arasında “Əməkdaşlıq barədə Kompleks Tədbirlər Planı” imzalanıb.

APA-nın məlumatına görə, sənədi Azərbaycan tərəfdən fövqəladə hallar naziri Kəmaləddin Heydərov, Ukrayna tərəfdən isə fövqəladə hallar və Çernobl fəlakətinin aradan qaldırılması naziri Vladimir Şandra imzalayıblar. Sənəd 2009-2011-ci illəri əhatə edir. Tədbirlər planı çərçivəsində müvafiq qurumlar kadr hazırlığı, yanğın təhlükəsizliyi, radioaktiv təhlükəsizlik və s. sahələrdə əməkdaşlıq edəcəklər.

İmzalanma mərasimində çıxış edən K. Heydərov bildirib ki, artıq Azərbaycan FHN-in akademiyası yaradılıb. Orada nazirliyinin müxtəlif strukturları üçün mütəxəssislər hazırlanacaq. Nazir onu da bildirib ki, rəhbərlik etdiyi nazirliyin müxtəlif strukturları Ukraynanın müxtəlif qurumları ilə əməkdaş edir.