TQDK növbəti imtahanlara hazırlaşır

Oktyabrın 1-dən fənlər üzrə elmi-metodiki seminarlar start götürəcək

Tələbə Qəbulu üzrə Dövlət Komissiyası (TQDK) növbəti tədris ili üçün qəbul imtahanlarına hazırlıq məqsədilə ayrı-ayrı fənlər üzrə elmi-metodiki seminarlara başlayır. Oktyabrın 1-dən start götürəcək seminarlar həm də test tərtibi metodikasını təkmilləşdirmək məqsədi daşıyır.

TQDK-dan Lent.az-a bildiriblər ki, artıq müxtəlif fənlər üzrə elmi-metodiki seminar məşğələlərinin cədvəli də müəyyənləşdirilib. Belə ki, Ana dili və ədəbiyyat, ingilis dili, fransız dili, alman dili fənləri üzrə seminar-məşğələlər həftənin I, kimya II, fizika, şərq dilləri III, tarix, biologiya IV, coğrafiya, riyaziyyatdan isə V günlər keçiriləcək.

Komissiyada deyirlər ki, seminar-məşğələlərdə respublikanın ali və orta məktəb müəllimlərinin, elmi-metodik mərkəzlərin mütəxəssisləri iştirak edə bilər.

Elxan SALAHOV