Bakıda növbəti TEDxBakı konfransı keçiriləcək

Lent.az-ın məlumatına görə, TEDxBakı dünyada artıq 30 ildir davamlı təşkil olunan və alimlər, siyasətçilər, sahibkarlar, mədəniyyət xadimləri və onlarla digər ixtisas sahiblərini bir arada birləşdirən TED adlı konfransın lisenziyası əsasında keçirilir. Bölüşməyə dəyərli fikirlər ruhlu TED təcrübəsinin insanlar arasında yayılmasına xidmət edən və yerli imkanlardan yararlanan TEDx proqramı 2009-cu ilin mayından etibarən dünyanı dolaşır. İndiyədək planetin yüzlərlə şəhərlərində müstəqil TEDx tədbirləri keçirilib və bu təşəbbüslər durmadan artmaqdadır.
TEDxBakı konfransının məqsədi də hazırda ölkəmizdə yaşayan yüksək sənət, intellektual və elmi potensiala sahib insanları və xüsusən də bölüşməyə layiq fikir sahiblərini üzə çıxarmaqdır. “Ruhun dili ilə” adlı ilk TEDxBakı konfransı keçən ilin noyabrında keçirilib. Yeni layihə isə TEDWomen qlobal konfransının davamı olaraq Azərbaycan qadınının dünya ilə paylaşa biləcək fikirlərini beynəlxalq dəyərlər sırasına daxil etmək məqsədi daşıyır.

TEDxBakı ilə TED konfransı arasında hər hansı hüquqi asılılıq yoxdur.

Tədbir siyasi və kommersiya məqsədi daşımır.