Binəqədidə qəsəbələrin inkişafı ilə bağlı iclas keçirilib

Lent.az-ın məlumatına görə, RİH başçısı Alı Qocayev “Bakı şəhərinin qəsəbələrinin sosial-iqtisadi inkişafının sürətləndirilməsinə dair Tədbirlər Proqramı” çərçivəsində Bakı şəhərinin hər yerində olduğu kimi Binəqədi rayonunda da mühüm işlərin görüldüyünü, 5 qəsəbə üzrə 4 yeni məktəbin, 15 yeni tədris korpusunun, 3 yeni uşaq bağçasının, təcili tibbi yardım xidməti və poliklinikası olan tibb mərkəzinin tikilib istifadəyə verildiyini, 14 məktəb, 8 uşaq bağçasının, 2 səhiyyə və 1 mədəniyyət müəssisəsinin əsaslı təmir edildiyini diqqətə çatdırıb.

Qəsəbələrin elektrik enerjisi və təbii qazla təchizat sisteminin yenidən qurulduğunu, istilik enerjisi və su təchizatında böyük işlərin görüldüyünü və görüləcəyini qeyd edən Alı Qocayev rayonun qəsəbədaxili yollarının, M.Ə.Rəsulzadə, Biləcəri və Binəqədi qəsəbələrinin ərazisindən keçən bağ massivlərini və Abşeron rayonunun qəsəbələrini birləşdirən Binəqədi şosesinin yenidən qurulmasının, yeni iş yerlərinin açılması məqsədilə sahibkarlara münbit şəraitin yaradılmasının vacibliyini qeyd edib.

Tədbirdə Xocasən bələdiyyəsinin sədri Sara Əbilova, 28 May qəsəbəsinin icra nümayəndəsi Yusif Haqverdiyev, M.Ə.Rəsulzadə qəsəbə sakini Məhərrəm Hacıyev, millət vəkili Rafael Cəbrayılov çıxış ediblər.

Tədbirdə sadalanan problemlər və həllini gözləyən digər məsələlər haqqında müvafiq təkliflərin Bakı Şəhər İcra Hakimiyyətinə təqdim edilməsi haqqında qərar qəbul olunub.