BMT-nin seksual istismarla mübarizə aparacaq təmsilçiləri müəyyənləşdi

Məşhur “Hollivud” cütlüyü - aktrisa Demi Mur və aktyor Eşton Katçer BMT-nin seksual istismara qarşı mübarizə aparacaq yeni Fonduna rəhbərlik edəcəklər. Lent.az-ın “RİA Novosti” agentliyinə istinadən verdiyi məlumata görə, onlar insan alverinin qurbanı olmuş insanlara yardım göstərəcəklər.

Fond BMT-yə üzv ölkələr və könüllü donorlar tərəfindən maliyyələşdiriləcək. Demi Mur deyib ki, Eşton Katçerlə birlikdə seksual zorakılığa məruz qalmış, zorla müharibədə iştiraka məcbur edilmiş çoxlu sayda uşaqla söhbət ediblər: “Cinayətkarlar seksual istismara məcbur etdikləri qızlardan hər il orta hesabla 200 min dollar alırlar. Bu uşaqları müntəzəm zorlayırlar. Hər 100 uşaqdan 1-i bu fəlakətdən can qurtarır”.

Eşton Katçer isə dövlətləri bu məsələyə tək humanitar yox, həm də milli təhlükəsizlik problemi kimi baxmağa çağırıb: “Uşaqları seksual istismara məcbur edənlər həm də qeyri-qanuni narkotik vasitə və silah alveri ilə məşğuldurlar. Onların əldə etdikləri maliyyə vəsaitləri sonradan terrorçuların maliyyələşdirilməsinə yönəldilir”.