Gülər Əhmədova prokurorluqda dindirilib

Bu gün Milli Məclisin sabiq deputatı Gülər Əhmədova Bakı şəhər Prokurorluğunda dindirilib. Lent.az-ın məlumatına görə, təxminən 3 saat ərzində G.Əhmədova müstəntiqin suallarını cavablandırıb. Baş Prokurorluğun mətbuat xidmətinin rəhbəri Eldar Sultanov Lent.az-a Gülər Əhmədovanın Bakı şəhər Prokurorluğunda dindirilməsi xəbərini təsdiqləyib.

Qeyd edək ki, Azərbaycan Beynəlxalq Universitetinin sabiq rektoru Elşad Abdullayev sentyabr ayında Gülər Əhmədovanın da görüntüləndiyi və səsinin olduğu video-kadrları internetdə yerləşdirib. Audio və videoyazılarda dələduzluğun, yəni etibardan sui-istifadə etmə yolu ilə özgə əmlakını ələ keçirmənin əlamətləri olduğundan həmin məlumatların hərtərəfli, tam və obyektiv araşdırılmasını təmin etmək məqsədilə çoxsaylı təxirəsalınmaz istintaq və istintaq-əməliyyat tədbirlərinin keçirilməsinin zəruriliyini nəzərə alaraq toplanmış material üzrə Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) maddəsi ilə cinayət işi başlanıb.