Bakıda silahlı şəxslər iş adamının evinə basqın edib

Oktyabrın 30-na keçən gecə Bakı şəhərinin Qobu qəsəbəsində mənzilə silahlı basqın edilib. Hüquq-mühafizə orqanlarından Lent.az-a verilən məlumata görə, 4 naməlum şəxs Qobu qəsəbəsində Mübariz Əlicanovun evinə basqın edib. Odlu silahla silahlanmış və maska taxmış həmin şəxslər ev sahibi M.Əlicanovun həyat yoldaşının əl-qolunu bağlayıblar. Qadını hədələyən quldurlar mənzildən 4 min manat pul, 10 min manat dəyərində qızıl-zinət əşyaları, digər qiymətli əşyaları götürərək qaçıblar.

Hazırda polis silahlı basqınçıların müəyyən edilərək saxlanması istiqamətində iş aparır. Fakt üzrə cinayət işi başlanılıb.

Qeyd edək ki, basqına məruz qalmış evin sahibi iş adamıdır.

Nizam RZA