DəmirBank və AYİB növbəti kredit müqaviləsini imzalayıb

Beş il müddətinə imzalanan kredit müqaviləsinə əsasən tərəflər Azərbaycanda orta həcmli sahibkarlığın birgə maliyyələşdirilməsini həyata keçirə biləcəklər. Bu müqavilə üzrə AYİB hər bir layihənin 50%-dək dəyərində birbaşa maliyyələşdirməni həyata keçirir.

“DəmirBank 1998-ci ildən Avropa Yenidənqurma və İnkişaf Bankı ilə əməkdaşlıq edir və Azərbaycanda bu nüfuzlu təşkilatdan maliyyə vəsaitlərini cəlb edən ilk banklardan biridir. DəmirBank və AYİB arasında bağlanılan bu növ razılaşma üzrə ikinci sazişdir, ümumilikdə isə tərəflər arasında müxtəlif maliyyələşdirmə növləri üzrə doqquz müqavilə bağlanılıb” - deyə Bankın İdarə Heyətinin sədr müavini Yusif Cabbarov bildirib.

DəmirBank kredit proqramları üzrə 20-dən çox beynəlxalq təşkilatla əməkdaşlıq edir. Bu sırada Avropa Yenidənqurma və İnkişaf Bankı, Beynəlxalq Maliyyə Korporasiyası, Asiya İnkişaf Bankı, Hollandiya İnkişaf Maliyyə Şirkəti (FMO), Qara Dəniz Ticarət və İnkişaf Bankı, Alman-Azərbaycan Fondu, DEG Almaniya İnvestisiya Şirkəti, OFID Beynəlxalq İnkişaf Fondu, Özəl Sektorun İnkişafı üzrə İslam Korporasiyası, USAID və digər beynəlxalq təşkilatları qeyd etmək olar.