Dünya futbolunun ən məşhur simalarından bəziləri təkcə yaşıl meydanlarda deyil, kino ekranlarında da böyük uğur qazanıblar. Onların arasında Hollivud filmlərində baş rol oynayanlar, məşhur seriallarda epizodik obrazlar canlandıranlar və peşəkar aktyorluğa başlayanlar var.
Lent.az xarici KİV-ə istinadən futbolçu karyerası ilə yanaşı, aktyorluq sahəsində də özünü sınayan məşhur ulduzları təqdim edir.
Erik Kantona
“Mançester Yunayted”in əfsanəvi hücumçusu Erik Kantona aktyorluq sahəsində ən böyük uğur qazanan keçmiş futbolçulardan biridir. O, 1992–1997-ci illərdə İngiltərə klubunun heyətində çıxış edib və dörd dəfə Premyer Liqa çempionu olub.
1997-ci ildə cəmi 30 yaşında futbolçu karyerasını başa vuran Kantona hələ yaşıl meydanlarda çıxış etdiyi dövrdə kinoda debüt edib. O, 1995-ci ildə “Çəmənlikdə xoşbəxtlik” komediyasında, 1998-ci ildə isə “Yelizaveta” tarixi dramında çəkilib.
Futbolçunun ən məşhur ekran işlərindən biri 2009-cu ildə nümayiş olunan “Erikin axtarışında” filmidir. Burada o, özünün uydurma versiyasını canlandırıb. Film Kann kinofestivalının müsabiqə proqramında iştirak edib.
Kantona daha sonra “Xilas” (2014), “AKA” (2023), “Qatil” (2024) filmlərində və Netflix-in “Qeyri-insani resurslar” (2020) mini-serialında rol alıb.
Devid Bekhem
İngiltərə millisinin keçmiş kapitanı Devid Bekhem də kino sahəsində özünü sınayan məşhur futbolçulardandır.
O, 2015-ci ildə rejissor Qay Riçinin “U.N.C.L.E. agentləri” filmində kiçik epizodik rol alıb. Bekhem ekran əsərində kinomexanik obrazını canlandırıb. İki il sonra futbolçu eyni rejissorun “Kral Artur: Qılıncın əfsanəsi” (2017) filmində çəkilib. O, burada Triqqer adlı personajı oynayıb.
Çəkilişlər zamanı Bekhemin üzünə xüsusi qrim tətbiq olunub, dişləri isə deformasiyaya uğramış formada göstərilib. Buna görə də onu ilk baxışdan tanımaq çətin olub.
Bununla belə, keçmiş futbolçu peşəkar aktyorluq karyerasına başlamaq niyyətində olmadığını bildirib.
Zinəddin Zidan
Fransa futbolunun əfsanəsi Zinəddin Zidan da məşhur komediya filmində rol alıb.
O, 2008-ci ildə nümayiş olunan “Asteriks Olimpiya Oyunlarında” filmində epizodik obraz canlandırıb. Ekran əsərində Zidanla yanaşı, “Formula 1” üzrə dünya çempionu Mixael Şumaxer, basketbolçu Toni Parker və tennisçi Ameli Moresmo da iştirak ediblər.
Bu təcrübədən sonra Zidan aktyorluq fəaliyyətini davam etdirməyib.
Vinni Cons
Keçmiş uelsli futbolçu Vinni Cons idmandan kinoya uğurlu keçid edən ən məşhur simalardandır.
Futbolçu olduğu dövrdə “Uimbldon”, “Lids”, “Çelsi” və “Şeffild Yunayted” klublarında çıxış edən Cons sərt oyun üslubu ilə tanınıb. O, 1988-ci ildə “Uimbldon”la İngiltərə Kubokunu qazanıb.
1998-ci ildə Qay Riçinin “Kartlar, pullar və iki lülə” kriminal komediyasında debüt edən Cons qısa zamanda Hollivudun tanınmış simasına çevrilib.
O, 2000-ci ildə Bred Pitt və Ceyson Steytemlə birlikdə “Snatch” filmində çəkilib. Daha sonra “60 saniyəyə qaçırılma” (2000), “Avrotur” (2004) və “İks-adamlar: Son müqavimət” (2006) filmlərində rol alıb.
Sonuncu filmdə Cons Caggernaut adlı güclü mutantı canlandırıb. O, həmçinin “Ox” serialında da çəkilib.
Pele
Braziliya futbolunun əfsanəsi Pele də kino tarixində iz qoyan idmançılardandır.
O, 1981-ci ildə ekranlara çıxan “Qələbəyə qaçış” filmində Hollivud ulduzu Silvestr Stallone ilə birlikdə rol alıb. İkinci Dünya müharibəsi dövründə əsir düşərgəsində keçirilən futbol matçından bəhs edən filmdə Pele Luis Fernandes adlı braziliyalı futbolçunu canlandırıb. Ekran əsərində Maykl Keyn, Bobbi Mur və digər tanınmış futbolçular da iştirak ediblər. Filmin ən yadda qalan səhnələrindən biri Pelenin akrobatik zərbə ilə qol vurmasıdır.
Maraqlıdır ki, qapıçı rolunu oynayan Stallone çəkilişlərdən əvvəl peşəkar futbolçularla məşq edib və bu zaman bir neçə dəfə zədələnib.
Neymar
Braziliyalı ulduz Neymarın məşhur "Netflix" serialında çəkilməsi böyük marağa səbəb olub.
O, 2019-cu ildə “La Casa de Papel” (“Kağız ev”) serialının üçüncü mövsümündə epizodik rol alıb. Neymar serialda Juan adlı braziliyalı rahibi canlandırıb. Onun iştirak etdiyi səhnələr üçüncü mövsümün altıncı və səkkizinci bölümlərində göstərilib.
Futbolçu əvvəllər də aktyorluq sahəsində özünü sınayıb. O, 2017-ci ildə Vin Dizelin baş rolda çəkildiyi “xXx: Xander Keycin qayıdışı” filmində özünü canlandırıb.
Zlatan İbrahimoviç
İsveç futbolunun məşhur hücumçusu Zlatan İbrahimoviç 2023-cü ildə “Asteriks və Obeliks: Orta Krallıq” komediyasında rol alıb. O, ekran əsərində Antivirus adlı Roma döyüşçüsünü canlandırıb. Filmin yaradıcıları futbolçunun fiziki gücündən və xarakterik davranışlarından döyüş səhnələrində istifadə ediblər.
Maraqlıdır ki, İbrahimoviç filmdə çəkilərkən hələ peşəkar futbolçu karyerasını başa vurmamışdı. O, yalnız 2023-cü ilin iyununda futbolla vidalaşıb.
Ronaldinyo
Braziliyalı futbol əfsanəsi Ronaldinyo da qeyri-adi kino təcrübəsi yaşayıb. “Barselona” və “Milan”ın keçmiş ulduzu 2018-ci ildə “Kikboksçu: Cavab zərbəsi” filmində rol alıb. O, ekran əsərində Ronaldo adlı döyüş sənətləri mütəxəssisini canlandırıb. Personaj filmin baş qəhrəmanına döyüşə hazırlaşmaqda kömək edir.
Filmdə Ronaldinyo ilə yanaşı, Jan-Klod Van Damm, Mayk Tayson və Kristofer Lambert də çəkiliblər. Lakin Ronaldinyo bu təcrübədən sonra daimi aktyorluq karyerasına başlamayıb.
Serxio Aqüero
“Mançester Siti”nin keçmiş hücumçusu Serxio Aqüero da əyləncə sənayesində özünü sınayıb. 2019-cu ildə argentinalı futbolçu “The Superagents” adlı futbol mövzulu animasiya layihəsində personajlardan birini səsləndirib.
Karyerasını başa vurduqdan sonra isə Aqüero daha çox kompüter oyunları, kibersport və rəqəmsal məzmun istehsalı ilə məşğul olmağa başlayıb. O, 2020-ci ildə KRÜ Esports adlı kibersport təşkilatını təsis edib.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
