Şokoladlı xəmirlə piroq RESEPTİ

Hazırlanması çox tez başa gəlir, vaxtınızın çoxunu almayacaq. Bu yemək süzmə pendirindən hazırlanan zapekanka (sobada bişmiş piroq) ilə oxşardır, amma həm daha dadlı, həm də bayrama uyğun görünür.

Lent.az piroq reseptini təqdim edir:

Lazım olanlar:

Tvoroq (süzmə) kütləsi üçün:

500 qram yumşaq süzmə pendiri

3 ədəd yumurta

2/3 stəkan şəkər tozu

1/2 portağalın qabığının rəndəsi

1 xörək qaşığı qarğıdalı nişastası

100 qram əlavələr (kişmiş, qurudulmuş meyvə, qoz-fındıq) – istəyə görə

Şokoladlı xəmir üçün

80 qram soyudulmuş kərə yağı

90 qram şəkər tozu (təxminən 1/3 stəkan)

100 qram un (təxminən 2/3 stəkan)

2 xörək qaşığı kakao

Bişirmək üçün forma – təxminən 24 santimetr diametrdə

Hazırlanması

Əvvəlcə xəmiri hazırlayın. Kərə yağını sürtkəcdən keçirin və ya bıçaqla doğrayın. Üzərinə un, şəkər və kakao əlavə edin. Əvvəlcə əllə qarışdıraraq qırıntı halına salın, sonra xəmir yoğurun. Xəmirin az hissəsini (təxminən 1/3 hissəsini) polietilen torbaya qoyun və 20 dəqiqəlik dondurucuya yerləşdirin. Əgər vaxt varsa, soyuducuya da qoymaq olar – sadəcə daha uzun müddət saxlanmalıdır.

Bu vaxt süzmə kütləsini hazırlayın

Yumurta və şəkəri blenderlə yaxşıca çalın. Üzərinə nişasta və portağal qabığı rəndəsini əlavə edin. Kütləni qaşıqla qarışdırın. İstəyə görə kişmiş, quru meyvə və ya qoz da əlavə edə bilərsiniz.

Bişirəcəyiniz formanı perqament kağızı ilə örtün. Formanın altına qalan xəmiri yayın və bərabər şəkildə basın. Üzərinə süzmə kütləsini əlavə edin və hamarlayın. Soyudulmuş xəmiri iri sürtkəcdən keçirin və süzmə kütləsinin üzərinə səpin. Əvvəlcədən 180°C-yə qədər qızdırılmış sobada təxminən 45 dəqiqə bişirin.

Hazır olduqdan sonra piroqu formadan çıxarmayın!

Soyumağa və yaxşıca “oturmağa” vaxt verin – təxminən 5-6 saat. Bu zaman kəsimdə daha gözəl görünəcək və daha dadlı olacaq.

Nuş olsun!