Pişiyin yatmaq üçün seçdiyi yer onun sahibinə nə qədər güvəndiyini göstərə bilər. Hətta bahalı və rahat yatağının olmasına baxmayaraq, bir çox pişik gecələr sahibinin yatağında yatmağa üstünlük verir.
Lent.az xəbər verir ki, pişiklər sutkanın böyük hissəsini yuxuda keçirə bilər. Adətən onlar gündə təxminən 12-18 saat yatırlar. Yuxunun müddəti heyvanın yaşından, aktivliyindən və fərdi xüsusiyyətlərindən asılıdır. Gün ərzində pişik bir neçə dəfə yatdığı yeri dəyişə, günəş düşən pəncərə önünü, divanı və ya otağın sakit bir küncünü seçə bilər. Gecə isə vəziyyət dəyişir. Bir çox ev pişiyi insanın yanında yatmağa üstünlük verir. Bəziləri sahibinə sıxılır, digərləri isə ayaqlarının yanında uzanır. Mütəxəssislərin fikrincə, belə davranışın əsas səbəblərindən biri təhlükəsizlik hissidir.
Pişiklər güclü ov instinktlərinə malik olsalar da, təbiətdə özləri də daha iri heyvanların ovuna çevrilə bilərlər. Yuxu zamanı heyvan daha müdafiəsiz olur, çünki dərin yuxuda potensial təhlükələrə reaksiyası zəifləyir. Buna görə də pişik üçün təhlükəsiz yerdə yatmaq böyük əhəmiyyət daşıyır. Ev şəraitində isə belə “sığınacaq” sahibinin özü ola bilər. Əgər pişik mütəmadi olaraq insanın yanında yatır və rahat şəkildə dərin yuxuya gedirsə, bu, onun sahibinə yüksək səviyyədə güvəndiyini göstərə bilər.
Bununla belə, ev şəraitində də pişiyin instinktləri tamamilə yox olmur. Heyvan yatarkən tanımadığı səslərə, otaqdakı hərəkətə və ya açılan qapının səsinə reaksiya verə bilər. Buna görə də pişik bəzən insanın demək olar ki, hiss etmədiyi səsə belə qəfil oyanır. Digər mühüm səbəb istilikdir. Pişiklərin normal bədən temperaturu insanlardan daha yüksəkdir. İstirahət zamanı isti yerdə olmaq heyvanın bədən temperaturunu qorumağa daha az enerji sərf etməsinə imkan verir. Yataq və orada yatan insan pişik üçün həm yumşaq səth, həm də sabit istilik mənbəyidir. Qoxu da mühüm rol oynayır. Pişiklər tanış əraziləri və sosial qruplarının üzvlərini müəyyən etmək üçün qoxudan fəal istifadə edirlər. Sahibinin qoxusunun hopduğu yataq buna görə pişik üçün tanış, rahat və təhlükəsiz məkan kimi qəbul edilə bilər.
Pişiyin sadəcə yataqda uzanması deyil, sahibinə sıxılması, pəncələri ilə ona toxunması, sinəsinin və ya ayaqlarının yanında yatması da diqqətçəkən davranışdır. Adətən insanla məsafəni bu qədər azaltması heyvanın sahibinin yanında özünü sakit və təhlükəsiz hiss etdiyini göstərir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
