Yumurta bu üsulla daha dadlı olacaq

Yumurta bir çox yeməyin əsasını təşkil edir. İstər bazar günü səhər yeməyi, istərsə də tələsik hazırlanmış nahar üçün. Lakin bəzən yumurta yeməkləri dadsız və solğun olur. Dadı və görünüşü eyni anda zənginləşdirmək üçün isə bir gizli inqrediyent var, bu da turşu çuğunduru şirəsidir.

Lent.az-ın xarici istinadən verdiyi məlumata görə, çuğundur şirəsi yumurtalara həm parlaq çəhrayı rəng, həm də şirin, ədviyyatlı ləzzət verir. İstər qayğanaq, istər qızardılmış yumurta olsun, üzərinə azacıq çuğundur şirəsi tökdükdə vizual və dad baxımından fərq dərhal hiss olunur.

Çuğundur şirəsi qayğanağa necə əlavə olunur?

Yumurtaları adi qaydada kərə yağı və ya bitki yağı ilə bişirin. Yumurtalar demək olar ki, hazır olduqda, təxminən 1 yemək qaşığı çuğundur şirəsi əlavə edin. Qarışığı diqqətlə qarışdıraraq yumurtalar tam bərkiyənə qədər bişirin. Nəticədə həm rəng, həm də dad baxımından fərqli və ləzzətli bir yemək əldə edəcəksiniz.

Çuğunduru təzə şəkildə də əlavə etmək olar

Əgər turşu dadı xoşunuza gəlmirsə, yumurtaya təzə və ya sobada bişmiş çuğundur da əlavə edə bilərsiniz. Çuğunduru xırda kublara doğrayıb tavada yumşalana qədər qızardın, sonra çalınmış yumurtanı əlavə edib adi qaydada bişirin.

Çuğundur nə üçün faydalıdır?

Çuğundur təkcə dad verməklə qalmır, həm də sağlamlıq üçün çox faydalıdır. Tərkibindəki antioksidantlar və təbii nitratlar sayəsində qan dövranını yaxşılaşdırmağa və beyin funksiyalarını dəstəkləməyə kömək edir.

Beləliklə, yumurtanı həm göz oxşayan, həm də dadlı etmək istəyirsinizsə, turşu çuğunduru şirəsi və ya təzə çuğundur əlavə etmək mükəmməl bir üsuldur.