Baş Prokurorluq imtahan keçirir

Azərbaycan Respublikasının Baş Prokurorluğu tərəfindən prokurorluq orqanlarına qəbul olunmaq arzusunda olan şəxslər üçün 100 ştat vahidi üzrə elan edilmiş müsabiqə ilə əlaqədar namizədlərin sənədlərinin qəbulu cari il aprelin 29-da başa çatıb Lent.az-ın məlumatına görə, prokurorluq orqanlarına işə qəbulla bağlı sənədlərini təqdim etmiş 454 namizəd üçün test imtahanı mayın 18-də saat 10.00-da başlayaraq 3 saat ərzində Azərbaycan Texniki Universitetinin “İdman Sarayı”nda keçiriləcək (ünvan: Bakı şəhəri, Ayna Sultanova küçəsi, 5).

Namizədlər 11 may 2011-ci il tarixdən etibarən sənədlərin qəbulu barədə qəbzi və şəxsiyyət vəsiqəsini təqdim etməklə, test imtahanlarının suallar toplusunu Tələbə Qəbulu üzrə Dövlət Komissiyasının yerləşdiyi inzibati binada (Bakı şəhəri, akademik Həsən Əliyev küçəsi, 17) əldə edə bilərlər. İmtahanın keçiriləcəyi ünvan və vaxt barədə məlumatlar “Test imtahanına buraxılış vərəqəsi”ndə, imtahanın keçirilməsi qaydaları isə “Yaddaş kitabçası”nda əks etdiriləcək.