Azərbaycanlılar Xarkovda Qələbə gününü qeyd etdi - FOTO

Lent.az-ın məlumatına görə, tədbir keçmiş Sovetlər Birliyinin qəhrəman şəhərlərinin voleybol komandalarının beynəlxalq turniri çərçivəsində baş tutub. Tədbirə Böyük Vətən Müharibəsinin veteranları ilə yanaşı, Xarkov vilayət sovetinin rəhbərləri, Xarkov şəhərinin ali təhsil ocaqlarının nümayəndələri, tələbələr və ictimaiyyət nümayəndələri də qatılıb.

Tədbirdə çıxış edən “Dostluq” – Azərbaycan-Ukrayna Xarkov vilayət təşkilatının sədri, professor Murad Ömərov alman faşizmi üzərində qələbənin 66-cı ildönümü münasibətilə müharibə veteranlarını təbrik edib, onlara ən xoş arzularını çatdırıb. O, qələbənin təmin olunmasında Azərbaycan neftinin əsas amillərdən birinin olduğunu vurğulayıb.

Müharibə veteranları onlara göstərdikləri qayğıya görə “Dostluq” təşkilatına öz minnətdarlıqlarını bildirib. Təşkilatın keçirdikləri belə tədbirləri Azərbaycan Ukrayna münasibətlərinin inkişafına töhfə kimi qiymətləndiriblər.

Tədbirin sonunda müharibə veteranları bayram süfrəsinə dəvət olunublar. Milli geyimli azərbaycanlı gənclər veteranlara qiymətli hədiyyələr və pul mükafatı təqdim ediblər.