Dünya ən varlılar üçün sürətli varlanmanın yeni mərhələsinə qədəm qoyur.
Ən varlılar arasında sərvət toplama sürəti kəskin şəkildə artdıqca, dünya üzrə milyarderlərin sayı 2031-ci ilə qədər təxminən 4000 nəfərə çata bilər.
Lent.az xarici mediaya istinadən bildirir ki, “Knight Frank” şirkətinin analitiklərinin məlumatına görə, hazırda dünyada 3110 milyarder var. Bu rəqəmin növbəti beş il ərzində 25 faiz artaraq 3915-ə çatacağı proqnozlaşdırılır.
Qeyd olunur ki, multimilyonerlərin sıraları da sürətlə genişlənir. 30 milyon dollardan çox sərvətə malik insanların sayı 2021-ci ildəki 162.000-dən çoxdan 713.000-dən çoxa çatıb ki, bu da üç dəfədən çox artım deməkdir.
“Knight Frank”ın tədqiqat rəhbəri Liam Beyli milyarderlərin və milyonçuların sərvətinin texnologiyadan, xüsusən də süni intellektdən əldə edilən gəlir sayəsində "eksponensial olaraq artdığını" qeyd edib.
"Biznesin genişləndirilməsi üçün imkanlar heç vaxt bu qədər böyük olmayıb. Bu, texnologiya və süni intellekt sayəsində böyük sərvətin sürətlə toplanmasına kömək edib", - o vurğulayıb.
Araşdırmaya görə, milyarderlərin sayı ən sürətlə Səudiyyə Ərəbistanında artacaq və onların sayı ikiqatdan çox - 2026-cı ildəki 23-dən 2031-ci ildə 65-ə çatacaq. Polşada onların sayı da ikiqatdan çox - 13-dən 29-a, İsveçdə isə 81 faiz - 32-dən 58-ə çata bilər.
Eyni zamanda, ən varlılarla ən kasıblar arasındakı fərq artmaqda davam edir. World Inequality report hesabatına görə, 60.000-dən az insan (dünya əhalisinin cəmi 0,001 faizi) bəşəriyyətin bütün yoxsul yarısından üç dəfə çox sərvətə nəzarət edir.
Bu fonda super varlılara daha yüksək vergilər tətbiq edilməsi tələbləri artır. Oxfam xeyriyyə təşkilatı ötən il milyarderlərin sayının ilk dəfə 3000-i keçdiyini və onların ümumi sərvətinin 18,3 trilyon dollara çatdığını bildirib.
İlon Mask 785,5 milyard dollarlıq sərvəti ilə dünyanın ən varlı adamı olaraq qalır. “Google”ın həmtəsisçisi Larri Peyc 272,5 milyard dollarla ikinci, “Amazon”un təsisçisi Ceff Bezos isə 259 milyard dollarlıq sərvəti ilə üçüncü yerdədir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
