Sağlam qidalanma tərəfdarları tez-tez kartofu “zərərli” məhsullar siyahısına daxil edir və onu rasionda ən arzuolunmaz tərəvəzlərdən biri adlandırırlar. Kartofun ətrafında çoxlu yanlış təsəvvürlər formalaşıb.
Lent.az bu 5 mifi təqdim edir:
Birinci mif kartof çox kalorilidir.
Əslində, 100 qram adi qaynadılmış kartofda təxminən 77 kilokalori var. Bu, eyni miqdarda çörəklə müqayisədə təxminən üç dəfə azdır. Yüksək kalorililik əsasən qızardılmış kartofda və çoxlu yağla hazırlanan yeməklərdə ortaya çıxır.
İkinci mif kartof yalnız nişastadan ibarətdir və heç bir faydası yoxdur.
Hətta qaynadılmış kartofun bir porsiyası belə orqanizmi gündəlik C vitamini tələbatının təxminən 10 faizi, kalium ehtiyacının isə 20 faizi ilə təmin edir. Bundan əlavə, kartof iltihabəleyhinə xüsusiyyətlərə malikdir, əhval-ruhiyyəyə müsbət təsir göstərə, bağırsaqların, görmə orqanlarının və ürək-damar sisteminin fəaliyyətini dəstəkləyə, həmçinin diabet riskinin azalmasına kömək edə bilər. Faydalı maddələrin böyük hissəsi məhz kartofun qabığında yerləşir. Buna görə mütəxəssislər mümkün olduqda kartofu qabığı ilə bişirməyi və ya qaynatmağı tövsiyə edirlər.
Üçüncü mif batat kartofdan xeyli daha faydalıdır.
Praktikada bu iki kök tərəvəzin kalorililiyi və qlisemik indeksi bir-birinə çox yaxındır. Tərkibləri fərqli olsa da, bu fərq onlardan birini tamamilə rasiondan çıxarmağı əsaslandıracaq qədər böyük deyil. Mütəxəssislər hər iki məhsulu növbəli şəkildə istehlak etməyi məsləhət görürlər.
Dördüncü mif kartofu ətlə birlikdə yemək olmaz.
Bəzi insanlar hesab edir ki, kartofun tərkibindəki müəyyən zülallar ət zülalının həzmini çətinləşdirir. Lakin istilik emalı zamanı bu maddələr parçalanır. Buna görə kartof və ətin birlikdə yeyilməsi həzm üçün təhlükə yaratmır.
Beşinci mif kartof birbaşa diabetə səbəb olur.
Araşdırmalar göstərir ki, risk insan gündəlik olaraq artıq üç porsiya kartof istehlak etdikdə təxminən 3,5 faiz artır. Kartof fri isə bu göstəricini 36 faizə qədər yüksəldir. Beləliklə, əsas rol kartofun özünə deyil, onun miqdarına, istifadə tezliyinə və hazırlanma üsuluna aiddir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
