Xüsusi yığılan Ferrari 1000 avroya satışa çıxarıldı - Hərrac deyil!

Avropanın avtomobil bazarında ekzotika həvəskarlarının diqqətini çəkən qeyri-adi bir təklif ortaya çıxıb. Almaniyada elit Ferrari kimi ustalıqla yığılmış avtomobil satışa çıxarılıb. Lotun qiyməti cəmi 1000 avrodur və bu məbləğ müasir flaqman smartfonların qiyməti ilə müqayisə oluna bilər.

Lent.az xarici mediaya istinadla bildirir ki, avtomobilin kuzovunda şahə qalxmış at loqosu olsa da, satıcı avtomobilin əsl mənşəyini gizlətmir. Bu, Ferrari superkarı deyil, büdcə modelinin qaraj şəraitində edilən tüninq nəticəsində əldə olunmuş variantıdır.

Ferrariyə oxşayan bu avtomobilin yaradılması üçün əsas 1997-ci ildə istehsal olunmuş Fiat Coupe istifadə edilib. Orijinal Fiat Coupe modelinin dizaynı vaxtilə məşhur Pininfarina atelyesinin iştirakı ilə hazırlanıb. Lakin bu avtomobil, əsl Ferrari modellərinə xas olan aqressiv və kəskin dizayn xətləri ilə demək olar ki, heç bir oxşarlıq daşımır.

Pseudo-superkarın kapotu altında cəmi 1,8 litrlik dörd silindrli benzin mühərriki quraşdırılıb və onun 131 at gücü var. Avtomobilin odometrində isə 322 min kilometr yürüş qeydə alınıb ki, bu da nəqliyyat vasitəsinin kifayət qədər istifadə olunduğunu göstərir.

Satıcının sözlərinə görə, böyük yürüşə baxmayaraq avtomobilin mühərriki normal işləyir. Lakin kuzov və yürüş hissəsi ciddi müdaxilə tələb edir. Əsas problemlər kimi aşağıdakılar qeyd olunur:
•   avtomobilin alt hissəsində qaynaq işlərinə ehtiyac var;
•   egzoz sistemi tamamilə yanıb;
•   interyerdə ciddi aşınma izləri mövcuddur.

Avtomobilin salonu da “premium” üslubda dəyişdirilib. Superkar təəssüratı yaratmaq üçün əsas detal kimi sükanın mərkəzinə parlaq sarı Ferrari loqosu yerləşdirilib.

Bir sözlə, alıcı yalnız kuzovun bərpası ilə deyil, həm də digər ciddi problemlərlə üzləşməli olacaq. Avtomobilin qanuni şəkildə istifadəsinə əsas maneə isə etibarlı texniki baxışın olmamasıdır.

Bu nəqliyyat vasitəsinin qeydiyyat müddəti artıq başa çatıb. Bu isə o deməkdir ki, yeni sahib bütün texniki qüsurları tam aradan qaldırmalı və sərt ekspert yoxlamasından keçməlidir ki, avtomobil ümumi istifadə yollarına çıxış icazəsi ala bilsin.

Bununla belə, ekspertlər qeyd edir ki, 1000 avro kimi çox aşağı qiymət bu Fiat Coupe modelini qeyri-adi layihələr yaratmaq istəyən həvəskarlar və ya oxşar avtomobillərin bərpası üçün ehtiyat hissələri axtaranlar üçün cəlbedici “donor”a çevirir.