Şəkərləri böcəklərdən qorumağın ən asan yolu

Dəfnə yarpağı təbii antiseptik xüsusiyyətlərə malikdir və həşəratların yaranmasının qarşısını alır. Bu xüsusilə isti mövsümlərdə çox vacibdir. Şəkər qarışqaları, böcəkləri və güvəni cəlb edir. Dəfnə yarpağındakı efir yağları isə onları uzaqlaşdıraraq ehtiyatlarınızı qoruyur.

Lent.az xarici mediaya istinadla bu barədə xəbər verir.

“Şəkərdə dəfnə yarpağından istifadə etmək təhlükəli deyil. Onu ölçülü miqdarda əlavə etdikdə dadı dəyişmir. Ətri də demək olar ki, keçmir, xüsusən də qapaq möhkəm bağlanıbsa”, - deyə mütəxəssislər bildirirlər.

Bəzi evdar qadınlar dəfnə yarpağını yalnız şəkərdə deyil, həm də un, dənli bitkilər və duzda istifadə edirlər. O, kimyəvi qatqısız təbii konservant rolunu oynayır.

Dəfnə yarpaqları küfün inkişafını ləngidən təbii maddələr ehtiva edir, bu da rütubətli mətbəxlərdə xüsusilə faydalıdır.

Necə istifadə etməli?

1 kq-a qədər şəkər üçün bir ədəd dəfnə yarpağı kifayətdir. Yarpağı hər ay dəyişmək lazımdır ki, qoruyucu təsiri maksimum olsun. Yarpaq yumşalarsa və ya qaralarsa, bu, onun rütubəti hopdurduğunu və xüsusiyyətlərini itirdiyini göstərir. O zaman dərhal dəyişmək lazımdır.

Dəfnə yarpağı təhlükəsizdir və allergiyaya səbəb olmur, amma təsadüfən yeməyə düşməməlidir, xüsusilə xırda şəkərə.

Şəkəri dəfnə yarpağı ilə birlikdə şüşə və ya plastik, hermetik qapaqlı qabda, quru yerdə saxlamaq tövsiyə olunur.

Daha güclü qorunma üçün dəfnə yarpağını mixək və ya darçınla birlikdə istifadə etmək olar. Bu halda təsir artır və həşəratlar yaxınlaşmır.