Yavər Camalov iranlı nazirlə görüşüb

Müdafiə sənayesi naziri Yavər Camalov Azərbaycanda səfərdə olan İran İslam Respublikasının müdafiə və silahlı qüvvələrə dəstək naziri general – mayor Əhməd Vəhidinin başçılıq etdiyi geniş tərkibli nümayəndə heyətini qəbul edib.

Lent.az-ın Müdafiə Sənayesi Nazirliyinin rəsmi saytına istinadən verdiyi məlumata görə, Müdafiə Sənayesi Nazirliyinin Elektron Hesablayıcı Maşınlar zavodunda keçirilən görüşdə nazir Yavər Camalov nümayəndə heyətinə nazirliyin yaranması və fəaliyyəti barədə ətraflı məlumat verib.

Dostluq və mehribançılıq şəraitində keçən görüşdə iki ölkə arasındakı müdafiə sənayesi üzrə əməkdaşlığın inkişaf perspektivlərinə dair geniş fikir mübadiləsi aparılıb. Görüşün sonunda nümayəndə heyəti Elektron Hesablayıcı Maşınlar və “Peyk” zavodları ilə yaxından tanış olub, nazirliyin müəssisələrində istehsal olunan müdafiə təyinatlı məmulatlardan təşkil olunmuş sərgiyə baxıb.

Görüşdə Azərbaycanın İran İslam Respublikasındakı fövqəladə və səlahiyyətli səfiri Cavanşir Axundov və İran İslam Respublikasının Azərbaycandakı fövqəladə və səlahiyyətli səfiri Məhəmmədbağır Bəhrami də iştirak ediblər.