Sevil Məmmədlinin doktorluq dissertasiyası zəif sayılıb

Respublika Elmi Tədqiqatların Təşkili və Əlaqələndirilməsi Şurasının Biologiya elmləri bölməsi üzrə Problem Şurasının genetika və ekologiya seksiyalarının iclası keçirilib. Lent.az-ın Azərbaycan Milli Elmlər Akademiyasının (AMEA) rəsmi saytına istinadən verdiyi məlumata görə, iclasda Sevil Məmmədlinin 03.11.16 - Ekologiya və 03.00.15 - Genetika ixtisasları üzrə biologiya elmləri doktoru alimlik dərəcəsi almaq üçün təqdim etdiyi “Qamma və UB faktorlarla induksiyalanmış genomun qeyri-stabilliyini aşağı salan radioprotektor təsirləri” mövzusunda doktorluq dissertasiyası müzakirə olunub.

Müzakirələr zamanı təqdim olunan dissertasiyada tədqiqat obyektinin azlığı və doktorluq dissertasiyasının müdafiəsi üçün yetərli olmadığı qeyd edilib. Tədqiqat obyektlərinin sayının artırılması, işə elmi məsləhətçi ilə birlikdə yenidən baxılması və adının redaktə olunması, ixtisas şifrinin mövzuya uyğun şəkildə seçilməsi, nəticələrin bir daha işlənilməsi zəruri hesab edilib, rəy və təkliflər bildirilib. Dissertasiya işinin bəzi düzəlişlər edilərək Azərbaycan Prezidenti Yanında Ali Attestasiya Komissiyasına təqdim olunması məsləhət görülüb.