Məleykə Abbaszadə: “İki məqsədli imtahan ola bilməz”

Tələbə Qəbulu üzrə Dövlət Komissiyasının (TQDK) sədri Məleykə Abbaszadə Bakı Dövlət Universitetinin (BDU) rektoru Abel Məhərrəmovun orta məktəblərin buraxılış və ali məktəblərə qəbul imtahanlarının bir metodoloji müstəvidə birləşdirilməsi ilə bağlı təklifinə münasibət bildirib. Lent.az-ın verdiyi məlumata görə, Məleykə Abbaszadə hesab edir ki, imtahanların modelini dəyişmək, yaxud bu istiqamətdə hansısa dəyişikliklər populist formada yox, elmi əsaslarla aparıla bilər.

TQDK sədri qeyd edib ki, orta məktəblərdə attestat imtahanları şagirdlərin orta səviyyəsini müəyyən edir: “Ali məktəblərə qəbul və orta məktəblərdə attestat imtahanlarının məqsədləri müxtəlifdir. İki məqsədli imtahan ola bilməz. Amma təhsil qanununa əsasən, birinci mərhələdə olan attestat imtahanın nəticələrini yeni qəbul qaydalarında nəzərə alıb, attestat qiymətlərinə əsasən abituriyentlərə müəyyən bal vermək istərdik. Amma bu üçün attestat qiymətləri və uşaqların imtahanda göstərdikləri nəticə heç olmasa imtahan verdiyi fənlər üzrə üst-üstə düşməlidir. Bunu izləyirik. Lakin hələ demək olmaz ki, müsbət nəticə var”.

Məleykə Abbasova bildirib ki, bu il birinci dəfə orta məktəbi bitirərək medal alan şagirdlər ali məktəblərə qəbul imtahanları verəcəklər: “Biz imtahandan sonra əlaçı uşaqların, orta məktəbi medalla bitirənlərin qəbul imtahanında göstərdiyi nəticələri araşdıracağıq. Biz görsək ki, heç olmasa ölkə üzrə 70 faiz məktəbdə aparılan qiymətləndirmə ali məktəbə qəbul imtahanı zamanı aparılan qiymətləndirmə ilə üst-üstə düşür, o halda biz ali məktəblərə qəbul zamanı orta məktəb qiymətlərini nəzərə ala bilərik”.

Ramiz