BDU “Azərkosmos”u kadrla təmin edir

Lent.az-ın məlumatına görə, müraciətdə bildirilir ki, “Azərkosmos” ASC-nin normal iş fəaliyyətinin təmin edilməsi məqsədilə yüksək ixtisaslı mütəxəssislərin işə cəlb edilməsi və onların müvafiq təlimlər keçdikdən sonra cəmiyyətdə işlə təmin olunmaları Cəmiyyətin ən vacib məsələlərindəndir. Bu baxımdan respublikanın ən qabaqcıl tədris müəssisələrindən olan və yüksək ixtisaslı mütəxəssislərin hazırlanmasında müstəsna rolu olan BDU ilə əməkdaşlığa xüsusi önəm verən qurum universitetin tətbiqi-riyaziyyat və kibernetika, mexanika-riyaziyyat və fizika fakültələrində bakalavr və magistr pillələrinin son kursunda təhsil alan tələbələrinin işlə təmin edilməsində maraqlıdır.

Bu məqsədlə Açıq Səhmdar Cəmiyyətin nümayəndələri BDU-da olub, adıçəkilən fakültələrin tələbələri ilə görüşüblər. “Azərkosmos” haqqında tələbələrə ətraflı məlumat verilib, işlə təmin olunacaqları təqdirdə görəcəkləri işlərlə bağlı məlumatlandırılıblar. Məlum olub ki, ASC-nin standartlarına cavab verən bir neçə BDU tələbəsi artıq adıçəkilən qurumda işlə təmin olunub və proses davam edir.