Türkiyə 2026-cı ildə də turistlərin ən çox üz tutduğu ölkələrdən biri olaraq qalır. Ancaq səyahət etməzdən əvvəl ölkədə qüvvədə olan təhlükəsizlik qaydalarını, gömrük məhdudiyyətlərini və qadağaları bilmək vacibdir. Mütəxəssislər xəbərdarlıq edirlər ki, bəzi qaydaların pozulması cərimə, hətta hüquqi məsuliyyətlə nəticələnə bilər.
Lent.az xarici mediaya istinadən xəbər verir ki, mütəxəssislər turistlərə izdihamlı yerlərdə daha diqqətli olmağı tövsiyə edirlər. Xüsusilə hava limanları, ibadət yerləri və böyük dini tədbirlər zamanı ehtiyatlı davranmaq məsləhət görülür.
İstanbul və digər iri şəhərlərdə zaman-zaman etiraz aksiyaları keçirilə bilər. Belə hallarda nümayişlərdən uzaq durmaq və kütləvi toplaşma baş verərsə, ərazini dərhal tərk etmək tövsiyə olunur.
İstanbulun məşhur turizm bölgələrində cibgirlik və küçə oğurluqları da geniş yayılıb. Buna görə sənədlərinizi, pulunuzu və digər qiymətli əşyalarınızı nəzarətsiz qoymamaq vacibdir.
Turistlərə nağd pulu yalnız rəsmi valyutadəyişmə məntəqələrində dəyişmək, küçədə tanımadıqları şəxslərin pul mübadiləsi, restoran və ya gecə klubuna dəvət kimi təkliflərini qəbul etməmək tövsiyə edilir. Həmçinin tanımadığınız insanların təklif etdiyi yemək və içkiləri qəbul etmək məsləhət görülmür.
Şəhərdaxili nəqliyyatda isə yalnız rəsmi taksi xidmətlərindən və etibarlı mobil tətbiqlərdən istifadə etmək tövsiyə olunur.
Sənədlərinizi həmişə yanınızda saxlayın
Türkiyədə hüquq-mühafizə orqanları şəxsiyyətinizi yoxlamaq üçün sizi saxlaya bilər. Buna görə pasportunuzu və ya şəxsiyyətinizi təsdiq edən sənədi daim yanınızda gəzdirməyiniz tövsiyə olunur.
Dini məkanları ziyarət edərkən uyğun geyim seçmək vacibdir. Xüsusilə qadınlardan çiyinləri və dizləri örtən geyimlər geyinmələri gözlənilir.
İctimai nəqliyyatda, eləcə də qapalı ictimai məkanlarda siqaret çəkmək qadağandır. Bundan başqa, Türkiyə dövləti, türk xalqı və milli rəmzləri haqqında təhqiredici ifadələr işlətmək qanunla qadağan edilir və hüquqi məsuliyyət yarada bilər.
Türkiyəyə hansı əşyaları rüsumsuz aparmaq olar?
Gömrük qaydalarına əsasən, şəxsi istifadə və ya hədiyyə məqsədilə gətirilən, ümumi dəyəri 430 avroya qədər olan qeyri-kommersiya malları rüsumdan azaddır. 15 yaşdan kiçik sərnişinlər üçün bu limit 150 avro təşkil edir.
Əgər baqajın dəyəri 430 avronu keçərsə, artıq hissəyə görə vergi tutulur:
Avropa İttifaqı ölkələrindən gətirilən mallar üçün 30 faiz, digər ölkələrdən gətirilən mallar üçün 60 faiz. Əgər malların ümumi dəyəri 1500 avrodan çox olarsa, gömrük rüsumu ümumi qaydalara əsasən hesablanır.
Türkiyəyə bunları aparmağa icazə verilir
18 yaşdan yuxarı şəxslər üçün aşağıdakı limitlər tətbiq olunur:
600 ədədə qədər siqaret; 100 ədədə qədər siqarillo; 50 ədədə qədər siqar; 250 qrama qədər tütün; Alkoqol tərkibi 22 faizdən yüksək olan içkilərdən 1 litr; Alkoqol tərkibi 22 faizə qədər olan içkilərdən 2 litr; Hər biri maksimum 120 millilitr olmaqla 5 ədəd ətir flakonu; 1 kiloqrama qədər çay; 1 kiloqrama qədər həll olunan qəhvə; 1 kiloqrama qədər qəhvə dənələri; 1 kiloqrama qədər şokolad; 1 kiloqrama qədər şirniyyat.
Elektron avadanlıqlarla bağlı məhdudiyyətlər
Gömrük qaydalarına görə, turistlər bir videokamera (10 boş kaset və ya yaddaş daşıyıcısı ilə), bir fotoaparat (yaddaş kartı və ya 5 plyonka ilə), bir GPS naviqatoru, bir səs və ya görüntü yazan cihaz, bir oyun konsolu və bir radio və ya maqnitofon gətirə bilərlər.
Hansı məhsulların gətirilməsi qadağandır?
Heyvan mənşəli ərzaq məhsullarının Türkiyəyə gətirilməsi qadağandır. Bitki mənşəli məhsullar isə 3 kiloqrama qədər rüsumsuz idxal edilə bilər.
Dərman preparatlarını şəxsi istifadə üçün ağlabatan miqdarda aparmaq mümkündür. Bəzi hallarda həkim resepti tələb oluna bilər.
Hansı hallarda gömrük bəyannaməsi doldurulmalıdır?
Gömrük nəzarətində bəyan ediləcək əşyanız yoxdursa, yaşıl dəhlizdən istifadə edə bilərsiniz.
Əgər 5 min ABŞ dollarından artıq nağd pul, qiymətli zinət əşyaları və ya dəyəri 430 avrodan çox olan mallar daşıyırsınızsa, qırmızı dəhlizə keçərək gömrük bəyannaməsini doldurmalısınız.
Qaydaların pozulması, bəyan edilməli əşyaların gizlədilməsi və ya icazə verilən limitlərin aşılması cərimə və digər hüquqi məsuliyyətlə nəticələnə bilər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
