Güclü El-Nino hadisəsi 2026-2027-ci illərin qış mövsümündə dünyanın bir sıra məşhur turizm istiqamətlərində hava şəraitini ciddi dəyişə bilər. Bəzi bölgələrdə quraqlıq və meşə yanğınları, digərlərində isə güclü yağışlar, daşqın riski və normadan daha rütubətli hava gözlənilir.
Lent.az xarici mediaya istinadla xəbər verir ki, Sakit okeanda formalaşan güclü El-Nino 2026-cı ilin sonunadək daha da güclənə və müxtəlif regionlarda temperaturla yağıntı rejiminə təsir göstərə bilər.
Ümumdünya Meteorologiya Təşkilatının məlumatına görə, El-Ninonun 2027-ci ilin fevralına qədər davam etməsi ehtimalı olduqca yüksəkdir. Bu isə qış tətilini xaricdə keçirməyi planlaşdıran turistlər üçün adi hava proqnozundan daha çox amilə diqqət etməyi zəruri edir.
Bali və İndoneziyada yanğın riski arta bilər
Cənub-Şərqi Asiyada turistlərin xüsusilə diqqətli olmalı olduğu ölkələrdən biri İndoneziyadır.
Bali və ölkənin digər bölgələrində quraq mövsümün daha uzun çəkməsi gözlənilir. Uzunmüddətli isti hava və yağıntının azalması su çatışmazlığı problemini dərinləşdirə və meşə yanğınları riskini artıra bilər.
Sumatra və Kalimantanın bəzi ərazilərində artıq yanğınların müşahidə edildiyi bildirilir. Tüstü təkcə yanğın olan bölgələrə deyil, Sinqapur və Kuala-Lumpur da daxil olmaqla Cənub-Şərqi Asiyanın başqa ərazilərinə də yayıla bilər.
Bu səbəbdən turistlər üçün günəşli hava hər zaman rahat istirahət demək olmaya bilər. Havanın tüstü ilə çirklənməsi açıq havada istirahəti çətinləşdirə bilər.
Eyni zamanda Tailandın cənubu və Vyetnamda fərqli mənzərə yarana bilər. Yağıntıların azalması Phuket və Fukuok kimi məşhur istiqamətlərdə daha çox quru və günəşli günlərə səbəb ola bilər.
Avstraliyada quraqlıq və yanğın təhlükəsi
Avstraliya qış aylarında turistlərin maraq göstərdiyi istiqamətlərdən biridir. Bunun əsas səbəbi həmin dövrdə Cənub yarımkürəsində yay fəslinin yaşanmasıdır.
Lakin El-Nino Avstraliyanın mərkəzi və şərq hissələrində daha quraq hava, yüksək temperatur və yanğın təhlükəsinin artması ilə əlaqələndirilir.
Avstraliya Meteorologiya Bürosunun məlumatına görə, El-Nino dövründə ölkənin mərkəzi və şərq bölgələrində yağıntılar çox vaxt azalır.
Turistlər üçün ən ciddi risklərdən biri xüsusilə ölkənin cənub-şərqində meşə yanğınlarının artması ola bilər.
Avtomobillə uzun məsafəli səyahət və ya müxtəlif regionları əhatə edən marşrut planlaşdıran şəxslərin yanğın xəbərdarlıqlarını mütəmadi izləməsi tövsiyə olunur.
Bundan başqa, okean suyunun həddindən artıq isinməsi mərcan riflərinə də mənfi təsir göstərə bilər. Bu, dalğıclıq və snorkel üçün məşhur olan ərazilərdə mərcanların ağarması riskini artırır.
Yeni Zelandiyada güclü külək və quraqlıq mümkündür
Yeni Zelandiyada isə bəzi bölgələrdə daha güclü və uzunmüddətli küləklərin müşahidə olunması gözlənilir.
Qərb sahili və Cənub adasında daha rütubətli şərait yarana bilər. Oklend, Hoks-Bey və Kenterberi kimi ərazilərdə isə quraqlıq, yanğın və su istifadəsinə məhdudiyyət riski arta bilər.
Güclü külək nəqliyyatın fəaliyyətinə və turistlərin hərəkətinə də təsir göstərə bilər.
Karib hövzəsi El-Ninyodan faydalana bilər
Güclü El-Nino bütün turizm istiqamətləri üçün mənfi ssenari demək deyil.
Karib hövzəsi bəzi hallarda bu hava hadisəsindən müəyyən üstünlük əldə edə bilər.
El-Nino Atlantik okeanında qasırğaların formalaşmasını zəiflədən amillərdən biri hesab olunur. Buna görə də güclü tropik fırtınaların yaranması üçün şərait əvvəlki illərlə müqayisədə daha əlverişsiz ola bilər.
Bununla belə, qasırğa təhlükəsinin tamamilə yox olması gözlənilmir.
Barbados, Antiqua və Sent-Lüsiya əsas qasırğa mövsümü başa çatdıqdan sonra turistlər üçün cəlbedici istiqamətlər olaraq qala bilər.
ABŞ, Peru və Ekvadorda güclü yağışlar
Sakit okeanın digər tərəfində isə vəziyyət fərqli ola bilər.
El-Nino ABŞ-ın cənub bölgələrinə, o cümlədən Kaliforniyaya daha çox yağıntı gətirə bilər.
Perunun şimalı və Ekvadorda isə normadan artıq güclü yağışların müşahidə olunması mümkündür.
Belə hava şəraiti bəzi regionlarda daşqın və nəqliyyat problemləri riskini yüksəldə bilər.
Afrikada fərqli ssenarilər gözlənilir
Cənubi Afrikada El-Nino adətən daha quraq hava ilə əlaqələndirilir.
Cənubi Afrika Respublikası, Namibiya və Botsvanada turistlər çoxlu günəşli günlərlə qarşılaşa bilərlər. Lakin uzunmüddətli quraqlıq su ehtiyatlarına, bitki örtüyünə və vəhşi heyvanlara ciddi təzyiq yarada bilər.
Bu da safari turlarının şəraitinə təsir edə bilər. Şərqi Afrikada isə əks mənzərə gözlənilir.
Keniya və Tanzaniyanın ekvatorial ərazilərində El-Nino oktyabr-dekabr aylarında qısa yağış mövsümünü gücləndirə bilər.
Yağıntıların artması savannaların sürətlə yaşıllaşmasına və bölgəyə daha çox köçəri quşun gəlməsinə səbəb ola bilər.
Bununla yanaşı, intensiv yağışlar bəzi ərazilərdə yolların keçilməz hala gəlməsinə və safari marşrutlarının çətinləşməsinə də səbəb ola bilər.
Turistlər nəyə diqqət etməlidir?
İqlim mütəxəssisləri xəbərdarlıq edirlər ki, El-Nino konkret şəhərdə müəyyən gündə hansı havanın olacağını dəqiq müəyyən etmir. Bu hadisə yalnız müəyyən hava şəraitinin başvermə ehtimalını artırır.
Məsələn, İndoneziya və Avstraliyada quru hava turist üçün ilk baxışda əlverişli görünə bilər. Lakin yanğınlar, tüstü və su çatışmazlığı istirahəti ciddi şəkildə çətinləşdirə bilər.
Eyni qayda daha çox yağış gözlənilən istiqamətlərə də aiddir. Yağıntılar təbiəti daha yaşıl edə bilər, amma daşqın və nəqliyyat problemləri də yarada bilər.
Bu səbəbdən 2026-2027-ci illərin qışında xarici səfər planlaşdıran turistlərə yalnız temperatur proqnozunu deyil, həm də yanğın xəbərdarlıqlarını, hava keyfiyyətini, yağıntıları və nəqliyyat vəziyyətini izləmək tövsiyə olunur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
