Təyyarəyə öz yeməyinizi gətirə bilərsiniz?

Bir çox sərnişin hələ də bilmir ki, bəzi ərzaq məhsullarını təyyarənin salonuna keçirmək və ya Avropa ölkələrinə aparmaq qadağandır. Bununla belə, əksər aviaşirkətlər sərnişinlərə özləri ilə qəlyanaltı götürməyə icazə verir.

Lent.az xarici mediaya istinadla xəbər verir ki, easyJet, Ryanair, Jet2 və TUI sərnişinlərin öz yeməklərini gətirməsinə icazə versə də, bəzi məhsullar və içkilər üçün məhdudiyyətlər qüvvədə qalır.

TUI hansı qaydaları tətbiq edir?

TUI-nin yeddi saatdan uzun məsafəli reyslərində yemək və içkilər bilet qiymətinə daxildir. Daha qısa uçuşlarda isə sərnişinlər yemək və içkiləri təyyarədə ala bilərlər. Şirkət sərnişinlərin öz yeməklərini gətirməsinə icazə versə də, ekipajın evdən gətirilən qidaları soyutmaq və ya qızdırmaq imkanının olmadığını bildirir. Yeganə istisna körpə qidaları və uşaq butulkalarıdır.

Bundan əlavə, sərnişinlərin özləri ilə gətirdikləri spirtli içkiləri uçuş zamanı istifadə etmələri qadağandır.

easyJet-də vəziyyət necədir?

easyJet sərnişinlərə qida məhsullarını salona keçirməyə icazə verir. Lakin şorba, yoqurt, krem və sous kimi maye və ya yarımmaye məhsullar hava limanlarının maye daşıma qaydalarına tabedir. İsti içkilərin isə yalnız təhlükəsizlik yoxlamasından keçdikdən sonra alınması və qapaqlı, möhkəm bağlanan qabda daşınması mümkündür.

Şirkət həmçinin bəzi ölkələrin ərzaq məhsullarının idxalı ilə bağlı xüsusi qaydalarının olduğunu xatırladır və səyahət etməzdən əvvəl həmin qaydaların yoxlanılmasını tövsiyə edir.

Ryanair nəyi qadağan edir?

Ryanair sərnişinlərə öz qidalarını və alkoqolsuz içkilərini gətirməyə icazə verir. Bununla belə, isti içkilərlə təyyarəyə minməyə icazə verilmir. Şirkət həmçinin duty free mağazalarından alınanlar da daxil olmaqla, şəxsi spirtli içkilərin istifadəsini qəti şəkildə qadağan edir. Uçuş zamanı yalnız təyyarədə satılan alkoqollu içkilərdən istifadə etmək mümkündür.

Jet2-nin daha sərt qaydaları

Jet2 qida və içkilərlə bağlı ən sərt qaydalara malik aviaşirkətlərdən biri hesab olunur. Şirkət təhlükəsizlik səbəbindən isti yemək və isti içkilərin salona keçirilməsini qadağan edir. Bundan əlavə, digər sərnişinlərə narahatlıq yarada biləcək kəskin qoxulu qidaların daşınmasına da icazə verilməyə bilər.

Bununla yanaşı, sərnişinlər soyuq qəlyanaltılar və hazır soyuq yeməklər götürə bilərlər. Təyyarədə əlavə olaraq yemək və içkilər almaq da mümkündür.

Avropa İttifaqına ərzaq apararkən diqqətli olun

Mütəxəssislər xatırladırlar ki, aviaşirkətlərin qaydaları ilə gömrük qaydaları fərqli anlayışlardır. Hazırda Avropa İttifaqına bir çox ət və süd məhsullarının gətirilməsi məhdudlaşdırılıb. Xüsusilə vetçinalı sendviçlər, pendirli sendviçlər, kolbasa məhsulları, yoqurtlar və süd məhsulları ilə bağlı problemlər yarana bilər.

Aİ bu məhdudiyyətləri heyvanlar arasında yayıla biləcək təhlükəli xəstəliklərin qarşısının alınması ilə izah edir. Oxşar qaydalar Böyük Britaniyada da qüvvədədir və bəzi ət və süd məhsullarının Avropa İttifaqından gətirilməsinə məhdudiyyətlər tətbiq olunur.

Mütəxəssislər bildirirlər ki, epidemioloji vəziyyətdən asılı olaraq qaydalar dəyişə bilər. Buna görə də səyahətə çıxmazdan əvvəl gedəcəyiniz ölkənin aktual tələblərini yoxlamaq tövsiyə olunur.

Stüardessalardan sərnişinlərə çağırış

Bələdçilər sərnişinlərə diqqətlərini cəlb etmək üçün onlara toxunmaq vərdişindən imtina etməyi tövsiyə edirlər. Onların sözlərinə görə, bəzi sərnişinlər hətta stüardessaları itələməyə qədər gedib çıxırlar.

Əgər uçuş zamanı qulaqcıq, içki və ya hər hansı köməyə ehtiyacınız varsa, ekipaj üzvlərinə toxunmaq əvəzinə çağırış düyməsindən istifadə etmək və ya sadəcə şifahi şəkildə müraciət etmək kifayətdir.