Baksansk Su Elektrik Stansiyasını partladanlar tutuldu

Rusiya hüquq-mühafizə orqanları bu ilin iyulunda Kabarda-Balkardakı Baksansk Su Elektrik Stansiyasında (SES) törədilən təxribatın iştirakçılarından 2-i saxlayıb. Lent.az-ın Rusiya mətbuatına istinadən verdiyi məlumata görə, bu barədə Rusiya Baş Prokurorluğu nəzdindəki İstintaq Komitəsi məlumat yayıb.

Saxlanılanlar istintaq zamanı törətdikləri əməli etiraf edib, məqsədlərinin dövlətə ziyan vurmaq olduğunu söyləyiblər. Bundan əvvəl SES-də təxribat törədənlərdən 2-i öldürülüb.

Təhqiqat Komitəsinin məlumatında bildirilir ki, cinayətkar qrup SES-i partlatmağa cəhd göstərib. Bu qrupun üzvləri Baksansk milisinin müstəntiqi Albert Şibzuxovun ölümündə də şübhəli sayılırlar.

Cinayətkar qrupun üzvlərinin neçəsinin hələ azadlıqla olduğu barədə məlumat verilməyib. Bundan əvvəl SES-ə 12 nəfərə qədər şəxsin daxil olduğu bildirilirdi.

Baksask SES-ə hücum iyulun 21-də olub. Silahlı şəxslər 2 mühafizəçini öldürüb, mühərrik zalında 5 partlayıcı qurğu quraşdırıblar. İki dəfə partlayış baş verib, sonra yanğın başlayıb. Üç hidroqurğu zədələnib.