"İlin şairəsi" danışdı: "Allah verdiyi istedaddır"

Bir neçə gün öncə “İlin şairəsi” adına layiq görülən əməkdar artist Elza Seyidcahan danışıb. Lent.az-a açıqlama verən ifaçı bildirib ki, ona təqdim olunan “İlin şairəsi” adı media qurumları arasında keçirilən sorğu nəticəsində bəlli olub: “Mən bu sənətə bəstəkar kimi gəlmişəm. Əsərlərimi Azərbaycanın bir çox tanınmış müğənniləri öz repertuarına daxil ediblər. Daha sonra müğənni kimi fəaliyyətə başladım və sevildim. Son zamanlar isə şairə kimi də tanınıram. Məni tanıyanlar bilir ki, illərdir ki, şeir yazıram. Amma bu istedadımı son illərdə üzə çıxardım. İndi bir çoxları mənim şeirlərimi öz adlarına çıxarıb. Şairəlik mənim arzum deyil, sadəcə Allahın verdiyi bir istedaddır ki, bunu da insanlarla bölüşürəm. Yazdığım bir şeirə tanınmış müğənni Elton Hüseynəliyev mahnı da oxuyub. Hələ bir neçəsini də digər həmkarlarım oxuyacaq. Fəlsəfi fikirlərim var. Şeirlərimi hər kəs anlaya bilməz. Yazdığım şeirləri hər kəs öz dünya görüşünə görə qiymətləndirir. Buna görə də həmin insanların mənim şeirlərimə lağ etmələri məni maraqlandırmır. Mən, “İlin şairəsi”yəm”.