Azərbaycanın ÜST İcraiyyə Komitəsinə üzvlüyə təqdimatı qəbul olunub

Danimarka Krallığının Kopenhagen şəhərində Ümumdünya Səhiyyə Təşkilatı (ÜST) Avropa Regionu üzrə Daimi Komitəsinin 18-ci çağırışının üçüncü iclası keçirilib. Lent.az-ın Səhiyyə Nazirliyinin rəsmi saytına istinadən verdiyi məlumata görə, tədbirdə Daimi Komitəyə üzv dövlətlərin nümayəndələri, habelə ÜST-nın Avropa Regionu üzrə rəhbərliyi Katibliyinin nümayəndələri iştirak ediblər.

İclasda Azərbaycan tərəfi 12-15 sentyabr 2011-ci il tarixlərində Bakıda keçiriləcək ÜST Avropa Regionunun 61-ci sessiyasının keçirilməsinə dair təşkilatı məsələlər, görülmüş işlər, habelə Azərbaycan Respublikası hökumətinin aidiyyəti qurumları ilə ÜST Katibliyinin görüşlərinə dair məruzə ilə çıxış edib.

Qeyd edək ki, 2012-ci ilin may ayında ÜST-nin İcraiyyə Komitəsində Estoniya, Almaniya, Fransa və Serbiyanın üzvlük müddəti sona çatır. Həmin vakant yerlərə ÜST Avropa Regionundan Azərbaycan, Çernoqoriya, Xorvatiya, Slovakiya, Litva və Belçika öz nominasiyalarını təqdim ediblər.

Daimi Komitənin üzvlərinin yekdil səsləri ilə Azərbaycan Respublikasının 2012-ci ildən ÜST İcraiyyə Komitəsinə üzvlüyə təqdimatı qəbul olunub. Xatırladaq ki, ÜST rəhbər orqanlarının tarixində ilk dəfə olaraq hər hansı bir ölkə bir necə dəfə üzvlüyə qəbul olunur.

Azərbaycan Respublikası ardıcıl olaraq 2005-2008-ci illərdə İcraiyyə Komitəsində üzv olub və 2009-2012-ci illərdə Daimi Komitədə, 2012-2015-ci illərdə isə yenidən İcraiyyə Komitəsində təmsil olunacaq.