Bu qatar relslərə toxunmur və 40 dəqiqəyə mənzilbaşına çatır

Təsəvvür edin, qatara minirsiniz, təkərlərin səsi eşidilmir, vaqon titrəmir. Qatar sadəcə relslərin üzərində, təxminən 10 santimetr hündürlükdə süzür. Cəmi 40 dəqiqə sonra isə artıq 250 kilometr uzaqdasınız. Elmi fantastika kimi səslənir? Yaponiya üçün bu, reallıqdır.

Lent.az xəbər verir ki, maqnit yastığı üzərində hərəkət edən L0 seriyalı qatar sınaq zamanı 603 km/saat sürətə çatıb. Bu, sərnişin təyyarəsinin havaya qalxma sürətindən belə yüksəkdir. Qatar artıq kommersiya xəttinə çıxmağa yaxındır.

Bunu mümkün edən texnologiya maqnit levitasiyası, qısaca “maglev” adlanır. Adi təkər və rels əvəzinə güclü elektromaqnitlərdən istifadə olunur.

Qatar faktiki olaraq havada asılı vəziyyətdə qalır və xüsusi istiqamətləndirici yolun üzərində sürüşür. Təkərlə rels arasında təmas olmadığı üçün sürtünmə də demək olar ki, aradan qalxır. Onun sürətini məhdudlaşdıran əsas amil hava müqavimətidir.

L0 qatarı saniyədə 160 metrdən çox məsafə qət edə bilir.

Hazırda qatar əsasən Fudzi dağı yaxınlığındakı Yamanasi prefekturasında yerləşən sınaq xəttində hərəkət edir. Bu sınaq trasının uzunluğu 42,8 kilometrdir.